NGANO man tuod nga naundang kining cleanup drive sa siyudad. Karon nga ibalik ang maong program hinaut ta suportahan kini sa pribadong sector.

Gihan-ay na ni konsehal Dante Pajo, tsirman sa komitiba sa health and sanitation, ang petsa alang sa binulan nga cleanup operation.

Gisuportahan sab ni Mayor Vicente Emano pinaagi sa iyang Executive Order 013-2010 nga nagpahinumdom usab sa mga molupyo sa ilang katungdanan paglimpyo sa ila mismong tugkaran.

Matod ni Pajo ang cleanup operation pangulohan sa City Engineering Office ug alalayan sa nagkadaiyang government agencies ug mga pribadong mga buhatan.

Aron mas epektibo kining programaha, kinahanglan hingusgan gyud unta sa gobiyerno paggukod sa mga illegal nga paglabay og basura. Nagpasagad ug nagpataka nalang ning uban paglabay sa ilang basura. Ambot kon duna bay nasilotan nga nagpataka og labay sa basura.

Ang problema gud karon, tungod kay gobiyerno man ang nagdumalaa pagpangolekta og basura, bisan asa nalang pod ipanglabay ang basura kay lagi dunay gobiyerno nga mosunod kanunay paghipos.

Unsa kaha kon itugyan nato ang pagpangolekta ngadto sa pribadong kompaniya. Gihimo na kini sa ubang bahin sa nasod. Epektibo baya.

Pero, para nako, pribado ug gobiyerno man ang modumala, kon walay insaktong sistema, ug kuwang ang kooperasyon sa katawhan, magpasad gihapon ang basura.

Ang sekreto ani mao ra gyud ang pagbutang sa basura diha sa insaktong butanganan, dili magpataka og labay sa basura, ug tultolon kanunay ang paglimpyo sa palibot.

Kon himoun kini, ako nagtuo nga kaya sa tanan, dili na kinahanglan ang cleanup drive sa siyudad kay wala nay sapa nga barado ug walay basura nga magpasad sa kadalanan.

Sa tinuod, disiplina sa kaugalingon ra gyud ang kinahanglan.

Unta makab-ot kining tinguha sa siyudad nga mahimong labing limpyo sa tibuok nasod. Atong suportahan kining programa sa konseho ug sa atong mayor sa dakbayan.