PIPILA ka adlaw gikan karon moabot na usab ang kapistahan ning siyudad sa Cagayan de Oro ug namatikdan nga daghan na sa mga kalingawan sama sa carnival rides ang Makita diin gikabalak-an ang seguridad.
Dili ikalimod nga ang carnival rides ning siyudad ang kasagaran maoy duolan sa tibuok pamilya.
Ning uwahi nakadawat og reklamo ang Sun.Star Superbalita nga daw kuyaw kayo ang usa sa kalingawan sa carnival nga mao ang wall of death tungod kay posibleng molapas ang mga riders niini ug maigo ug mabanggaan ang nanan-aw niini nga anaa sa taas nga bahin.
Tuod man daghan usab ang nalingaw niini apan daghan ang nangutana sa ilang seguridad.
Apan usa ka trabahante sa carnival nga nahinabi sa Sun.Star Superbalita niingon nga unang rules nga ilang gihimo mao gyod ang paghatag og seguridad sa mga sumasakay ug mga nanan-aw. Gani sa ang roller coaster sa dili pa mosakay adunay pahinumdom kanunay nga ang adunay mga sakit nga gibati labina sa kasing-kasing, tigulang ug bata nga nag-edad og 10 anyos paubos gibawal sa pagpasakay niini.
Apil niini ang kakuyas sa roller coaster, sed dragon, ferris wheel ug uban pa.
Hinuon ang kagamhanan sa dakbayan wala mipasagad niini ug kasamtangan nga nihimo og inspeksiyon kung kini pasado pa sa structural requirements for safety.
Ang City engineers ug komite sa Games and Amusement ubos ni konsehal Adrian L. Barba nihimo na og ocular inspection labina sa Limketkai Center, Captain Vicente Roa ug C.M. Recto St., ning siyudad.
Kahinumduman nga daghan sa laing-laing dapit sa nasod ang na report kalabot sa aksidente sa carnival ug pipila nakabsan sa kinabuhi human nahulog. Apan gipasabot ni Barba nga dili mahitabo ang ingon niini ning siyudad.
"We should not wait for accidents to happen. We should ensure that all amusement rides are safe for all patrons," pasalig ni Barba. (Stephanie V. Berganio/uban sa taho ni NJM)