DUHA ang patay human nabangga ug nabanggaan niadtong Domingo sa gabii sa managlahing lungsod sa Misamis, Oriental.

Dead on arrival sa Northern Mindanao Medical Center (NMMC) ning siyudad sa Cagayan de Oro ang unang biktima nga mao si Norman Lagapa, 31, minyo, lumad nga taga Barangay Lunocan, Manolo Fortich, Bukidnon.

Si Police Officer 3 Nerio Amacio sa Tagoloan Police Station nga nahinabi sa Sun.Star Superbalita niingon nga dili tiaw ang naangkon sa biktima tungod kay nabungkag ang walang bahin sa mata niini, natabas ang walang bahin sa paa dihang nasungag ang gimanehong motorsiklo sa biktima niadtong Domingo mga alas 10:30 sa gabii sa Poblacion, lungsod sa Tagoloan.

Paingon ning siyudad ang biktima dihang nasungag sa Isuzu forward nga gimaneho ni Nelson D. Coronada, taga Bulua ning siyudad.

Matud ni Amacio nga unang gibiyaan sa driver ang biktima sa dapit ug mitahan kini sa Police Station 7 (PS7) sa Bulua apan gi-turn over sa kapolisan ngadto kanila.

Dali sab nga gitabang niadtong gabhiona si Lagapa ug gidala sa NMMC apan dead on arrival nga gideklarar sa mga doctor.

Reckless imprudence resulting to homicide ang kasong atubangon ni Coronada ning panahona kinsa nagtingkagol na sa prisuhan sa Tagoloan Police Station.

Sa laing bahin usa ka wala mailang lalaki ang nabanggaan patay mga alas 11:00 sa gabii samtang nitabok kini sa dalan sa lungsod sa Opol, Misamis Oriental.

Dead on arrival ang biktima sa Polymedic General Hospital ning siyudad human nabanggaan sa motorsiklo nga gimaneho ni Mervin Surtones, 24, ulitawo, taga Barangay Gasi, lungsod sa Laguindingan. Kauban niini ang angkas nga mao si Nexan

Apos, 17.

Samaran gihapon sila si Surtones ug Apos nga gipangdala sa NMMC apan blanko pa sila unsay pangalan sa nabanggaan labina nagpabilin pa ang patayng lawas sa Polymedic.

Gisaysay sa duha nga samtang nagmaneho og motorsiklo, kalit lang nga mitabok ang wala mailing lalaki hinungdan nga nabanggaan.

Hinuon ang driver niingon nga panahon nga makagawas sa balay tambalanan nipasalig nga dili talikdan ang nahimo batok sa biktima. (Stephanie V. Berganio)