MAG-AMAHAN nagtinigbasay human nangahubog sa alas 8:00 sa gabii, Dominggo.

Nailhan sa kapulisan ang biktima nga si Roger Ibanez, 20, ulitawo ug ang iyang amahan nga si Roberto, 50, ug pulos molupyo sa Barangay Poblacion, siyudad sa Kidapawan.

Si Superintendet Chino Mamburam, hepe sa kapulisan sa Kidapawan, nagsulti nga sayo pa sa hapon nag-inom na ang mag-amahan hangtud sa kagabhion.

Sa diha nga pulos na sila mga hubog, kalit nagkalalis gumikan sa problema sa pamilya ug nagsinumbagay.

Nakakuha og sundang si Roger ug gitigbas si Roberto. Apan nailog kini sa amahan, hinungdan nga iya sab nga giwaswasan ang anak.

Gumikan sa kagubot niresponde ang mga pulis ug nauwang ang away sa mag-amahan. Si Roger gidala sa iyang inahan sa Kidapawan Doctors Hospital (KDH) samtang si Roberto nga naka-angkon og ginagmay nga samad mitahan sa kapulisan.

Hinuon, ang pamilya nagkasabot nga ila na lamang husayon ang maong hitabo. (Edgardo Fuerzas)