USA ka lalaki gitulis sa duha ka wa mailhing mga suspetsadong nagsakay og motorsiklo didto sa Kilometro Zero, Barangay Cambanogoy, lungsod sa Asuncion, Davao del Norte, Dominggo sa hapon.
Nailhan ang biktima nga mao si Jennis Sollana, hamtung ang panuigon, ug molupyo sa Purok 4, Barangay Camabanogoy, lungsod sa Asuncion.
Sa report gikan sa Davao del Norte Provincial Office nasayran nga pasado alas 2:30 sa hapon samtang nagbaktas ang biktima sa dalan sa maong lugar, giatangan siya sa duha ka wa mailhing mga tawo lulan sa motorsiklo ug gitionan og kutsilyo dayon nga mideklara og tulis.
Wa nay nahimo si Sollana tungod kay mipatigbabaw ang iyang kahadlok hinungdan nga napugos siya sa pagtugyan sa iyang kuwarta nga balor P17-mil.
Human makuha ang tuyo, mga suspek dayong misibat padulong sa wa matino nga lugar sakay sa ilang sakyanan.
Ang biktimang si Sollana midangop na lamang ngadto sa kapulisan.
Mga sakop sa Asuncion Municipal Police Station mihimo karon og dugang pakisusi sa hitabo.
Samtang gipanid-an na sab sa mga otoridad kung unsang grupo ang nagtulis sa biktima. (Marvin Pineda)