USA ka lalaki kritikal ang kahimtang karon sulod sa ospital human gidunggab samtang nang-disco, didto sa Barangay, Nueva Fuerza, siyudad sa Tagum, Lunes sa kaadlawon.
Ang biktima nailhan nga mao si Lito Palle, hamtung ang panuigon, ug molupyo sa Purok 2, Barangay La Filipina, siyudad sa Tagum.
Sa report gikan sa Tagum City Police Station nasayran nga nahitabo ang pagpanunggab pasado alas 2:00 sa kaadlawon sa maong lugar samtang pauli na ang biktima sa ilang balay gikan nang-disco. Apan giatangan siya sa wa mailhing mga suspetsado ug dihang nakabinta gidunggab si Palle og kutsilyo.
Nahiagum og mga samad dinunggaban sa kalawasan ang biktima ug daling gidala sa ospital.
Mga suspek dali sab nga misibat padulong sa wa matino nga lugar human sa pagpanunggab.
Narekober pa sa mga otoridad ang usa ka kutsilyo nga dunay gitas-on nga 13 ka pulgadas didto sa nahitaboan nga maoy gituohang gigamit sa mga suspek.
Kapulisan sa siyudad sa Tagum mihimo na karon og dugang imbestigasyon sa hitabo. (Marvin Pineda)