NAGPROTESTA kagahapong adlawa ang mga militanteng pundok nga gipangulohan sa Transmission-Piston atubangan sa buhatan sa Land Transportation Office (LTO) Davao Region.
Mga militante nagprotesta sa maong buhatan aron babagan ang pagpatuman sa Motor Vehicle Users Charge (MVUC) nga mag-obliga sa tanang mga operators sa pagbayad og dugang P2,000 sa pagparehistro sa ilang mga sakyanan sa LTO.
"Nagprotesta mi karon kay among ipadayag ang pagsupak sa pagpatuman sa MVUC tungod kay dugang kini nga galastuhan sa mga motorista," suma ni Transmission Piston spokesperson Edil Gonzaga sa Superbalita.
Si Gonzaga nagbutyag nga tungod sa bag-ong usbaw sa MVUC, ang tricycle operators gimandoan karon nga mobayad og dos mil pesos, mas dako og deperensiya sa kanhi nilang gibayran nga P300.00 samtang ang multicab ug jeepney kinahanglang mobayad og dos mil pesos gikan sa kanhi nilang gibayaran nga P600.00.
Gawas sa maong balayrunon, suma ni Gonzaga, ang LTO nagpatuman usab sa laing balayrunon sama sa giingon nga inspection fee nga P300.00 alang sa mga filcab operators, P150.00 alang sa single motorcycle operators ug P600 alang sa mga operator sa truck ug bus.
Atol sa ilang protesta, mga militante subling nanawagan sa LTO ug sa administrasyong Aquino nga rebokahon ang Executive Order 197 ug repasuhon ang Republic Act 8794.
"Nganong kita man intawong mga kabus ug walay klarong kita ang pabug-atan og samot sa gobyerno? Nganong dili man resolbahon sa Aquino administration ang kurapsiyon aron ang kwarta sa katawhan magamit sa pagpaaayo sa mga kalsada?" pangutana ni Gonzaga.
Ang pagpatuman sa MVUC sa tibuok nasud pinasikad sa EO 197 ug RA 8794 nga nagmando nga ang tanang kita sa gobyerno gikan sa MVUC gamiton alang sa pagpaayo sa mga kalsada.
Mga militante nagpahayag nga di sila mohunong pagyawyaw sa kadalanan kung di maminaw kanila ang gobyerno.
Gisuwayan sa Superbalita pagkuha ang tubag sa mga opisyales sa LTO apan way mahinabi didto kagahapon sa buntag. (AD)