USA ka retiradong sundalo sa Army ang gipusil sa wa mailhing mamumuno nga nasaksihan sa iyang dose anyos nga anak samtang nagmaneho sa iyang motoriklo nga dunay sidecar sa alas 8:50 sa buntag niadtong Dominggo didto sa Tugbok, siyudad sa Davao.
Si Police Officer 3 Roque Osico sa Tugbok Police Station nag-ila sa biktima nga mao si Technical Sergeant Nestor Salamanca, 50, minyo ug nagpuyo sa Purok 9, New Loon, Barangay Mintal, distrito sa Tugbok.
Matud ni Osico sa iyang spot report nga sakay ang biktima sa iyang motorsiklo nga dunay plate number LT-9667 kauban ang iyang anak nga si Joyce pauli na unta sa ilang balay apan giatangan sila sa duha ka mamumuno.
Mga suspetsado giingon nga nagsakay og laing motorsiklo nga way plate number dayon gipusil ang biktima tumong sa iyang ulo.
Si Salamanca daling gitabang sa usa ka nagpakabana nga molupyo sa maong lugar ug gidala didto sa Adventist Hospital sa Bangkal apan dimalas kay patay na siya dihang miabot sa tambalanan.
Nakuha sa kapulisan didto sa eksena sa krimen ang motorsiklo sa biktima ug usa ka baseyo sa .45 kalibre nga pistola nga gigamit sa suspek.
Lawom nga imbestigasyon ang gilusad karon sa kapulisan aron tugkaron ang tinuod nga hinungdan nganong gipatay ang biktima.
Sa laing bahin, duha ka mga tawo ang gitambalan karon sa hospital human sila gipangdunggab sa managlahing hitabo niadtong Dominggo.
Alas 6:30 sa gabii gidala sa tambalan si Carlo Macias, 30, ulitawo human siya gidunggab ni Christopher Batoto, 18, pulos nagpuyo sa Purok 3, Barangay Lubogan, distrito sa Toril.
Si Macias nakaangkon og daghang mga samad sa kalawasan dihang giduslak ni Batoto kinsa nag-inom didto sa sulod sa balay ni Rowena Taganait.
Giingon nga miagi lang ang biktima sa maong lugar apan kalit siyang gidunggab sa suspetsado kinsa dali sab nga miikyas sa nahitaboan sa krimen.
Samtang alas 10:00 sa gabii gidunggab sab si Franklin Robles, 33, security guard sa Nemesis Security Agency ug nadestino sa G8 Plus (kanhi Duratex) didto sa Malagamot, Barangay Panacan.
Si Robles nakaangkon og samad sa kalawasan human siya gidunggab ni Rey Tanugan, hamtong ang edad, plastic feeder sa G8 Plus.
Nasayran nga gidunggab sa suseptsado ang biktima human niya gikalalis ang laing security guard sa maong kompanya tungod kay wa siya gipasulod.
Si Tanugan wa gipasulod sa usa ka gwardiya tungod kay hubog niadtong higayona, apan miagi siya sa luyo sa maong kompanya ug dayon gidunggab ang biktima.
Human sa pagpanunggab, gikawat sa suspetsado ang shotgun sa biktima dayon milayas paingon sa wa masayri nga lugar.
Ang duha atua karon gitambalan sa Southern Philippines Medical Center (SPMC). (Alger Dura)