ABUSADO. Ang kakulang sa mga drayber sa kahibawo sa lagda sa trapiko maoy usa sa mga hinungdan sa bangga sa mga sakyanan (motorsiklo o awto). Di pa makamao, abusado pa gyud. Susmaryosep!

Unya ang atong hepe sa Cebu City Traffic Group David Señor mitahag og tambag nga mag defensive driver ta. Abi nimo, chief, mas maayo kon inyong sikupon ug patagmon ang mga

abusadong drayber aron malikayan ang disgrasya sa kadalanan.

Updates on President Benigno Aquino III's presidency

Usa ka rason nga midaghan ang abusadong drayber sa kadalanan tungod kay dili strikto ang dakop sa mga drayber nga makalapas sa lagda sa trapiko. Aaah… tan-awon ra man gani sa traffic enforcer ang drayber nga nakasupak sa lagda sa trapiko.

Niadtong Sabado sa buntag gipaliko sa traffic enforcer ang awto diha dapit sa JY Square nga dunay dako kaayong traffic sign nga “No U-Turn”. Akong gibadlong ang traffic enforcer apan nagpabungolbungol lang.

Kanang eskina sa traffic light sa may tiilan sa bukid padung sa Marco Polo Plaza hotel pirming puno sa mga habal-habal nga di man ang eskina angayan nga parkingan, apan gidakop ba gud na sila?

Kon kulang man ang atong kapulisan sa trapiko ug traffic enforcers, kinahanglan pun-an ni Mayor Mike Rama aron mahapsay ang atong kadalanan og mawala na ang mga abusadong drayber sa kadalanan.

Dinhi ra ko makakita sa Sugbu nga ang mga drayber sa motorsiklo mosugat sa one-way nga dalan. Mao ni klase sa drayber di lang kay naghatag og labad sa ulo sa mga tarong nga drayber, apan ila pa gyud giinsulto ang kapulisan.

Naay Citom police car nga kausa akong nakit-an dapit sa uptown nga gilabyan lang ang drayber sa PUJ nga miurong tungod sa No Stopping sign kay mipasakay og pasahero.

Ingon ani kagubot ang atong trapiko sa dakbyan sa Sugbo. Hinaut unta hatagan ni og pagtagad ni Mayor Mike kay sa bise mayor pa siya magtrapiktrapik man siya kaniadto.

Mayor, kanang P30 milyunes nga imong igasto og paanindot sa imong opisina idugang na lang sa pundo sa Citom aron mapun-an ang traffic enforcer. Pagkadakong kalipay ni Citom chairman Jack Jakosalem kon mahitabo na mayor.

****

PATAY. Sukad sa pagpusil-patay sa akong amigo, kanhi Compostela Mayor Kokoy Reynes, nasundan na sad og laing pagpamusil-patay sa miaging adlaw dinhis Sugbo. Naalarma ang mga civic organizations.

Ang kakuwang sa pulis nga makita sa kadalanan maoy usa sa mga rason nga ang mga kriminal o gun-for-hire di mahadlok mamusil.

Unsaon man nga ang kadaghanan sa atong pulis mga bodyguard man sa pulitiko.

Laing rason nga ang mga pulis nawad-an og gana sa trabaho tungod sa kaso ni SPO1 Adonis Dumpit nga gikiha sa pagpusil-patay sa dihang miresponde siya sa biktima sa tulis diha sa Colon.

Ang mga pulis karon nawad-an og dedikasyon sa trabaho kay nahadlok sila nga mapareha unya ni Dumpit nga gikiha ug karon detinado tungod kasong pagpusil-patay sa usa ka snatcher nga mipusil kaniya.

Mipasumbingay si Gob. Gwen Garcia nga dunay kalabutan sa pagpamusil-patay sa miaging mga adlaw ang mga vigilantes. Apan gipanghimakak ni Kong. Tomas Osmeña ang maong pasangil.

Ang angayan unta nga motingog sa maong problema mao si Mayor Mike ug dili si Kongresista Osmeña o Gobernador Garcia. Nabisi tingale si Mayor Mike og pagpaanindot sa iyang opisina maong wa makahatag og pamung sa isyung pagpamatay.

Usa ka paagi nga makababag sa krimen mao ang paghatag katungod sa mga tawong responsable ug lisensyado sa armas sa pagdala sa ilang pusil nga di na magkinahanglan og permit to carry.

(elespinoza53@yahoo.com)