SI CEBU City Mayor Michael Rama gustong pahulipan na si Cebu city Police Director Patrocinio Comendador gumikan sa mga sunod-sunod nga ambush nga nahitabo dinhi sa dakbayan. Mao usab si Lapu-Lapu City Mayor Paz Radaza gusto niyang pahulipan ang iyang City Director nga si Mariano Natuel gumikan gihapon sa mga krimen nga nahitabo sa maong dakbayan.
Alang kanako morag dili kini maki-angayon sa duha ka mga opisyal sa kapulisan gumikan kay sa akong pagtan-aw maayo man ang performance nila ni Comendador ug Natuel. Tinuod, adunay mga dagkong krimen nga nahitabo apan nahatagan man og kasulbaran sa kapulisan.
Dinhi sa Sugbo na-ilhan ug nadakpan man ang mga responsable sa pipila ka mga krimen.
Unya sa akong pagpaniid mitrabaho man og maayo kini sila og wala mahilambigit sa mga anomaliya sama sa protection racket.
OVERSTAYING
Kon mo-ingon sila si Rama ug Radaza nga ilang pahulipan ang ilang tagsa-tagsa ka mga hepe gumikan kay overstaying na o sobra na sa ilang gihatag nga tour of duty, aw, kana dili ko mosupak. Ang policy sa Philippine National Police (PNP) ang labing taas nga tour of duty sa usa ka hepe sa usa ka lugar, duha ka tuig lamang. Kini aron dili masuod ang mga opisyal sa kapulisan sa mga tawo nga nagpasi-ugda og mga illegal nga kalihukan sa ilang area of responsibility. Sige lang unya og ‘oplan pa-ala-ala’.
Hinuon, katungod kana sa usa ka mayor o gobernador kon si kinsa ang iyang himuon nga hepe nga sa iyang tan-aw kasaligan ug maka-implementar sa iyang kagustuhan.
Politicized naman god kining pagpili og hepe sa kapulisan.
Ang PNP igo lang mosubmiter og lima ka pangalan nga pili-an sa mayor ug gobernador. Puwede pod nga i-apil sa listahan ang gusto sa local chief executive basta pasado lang sa Senior Officers Placement Board. Under the bunal gyod ang mga hepe sa mga local chief executives.
GIPASINGITAN
Morag adunay gipasingitan si Gov. Gwen Garcia sa dihang mi-ingon siya nga kining sunod-sunod nga pagpang-ambush karon binuhatan kini sa mga gun for hire nga mga vigilantes kaniadto.
Nahimong gun for hire kini sila og modawat na lang bisan sa gamay nga kantidad gumikan kay dili naman makahatag og suporta ang kanhi amo niining maong mga vigilantes.
Bisan tuod og walay gihinganlan si Gov. Garcia apan klaro og tataw kaayo nga si kanhi mayor ug karon Congressman Tomas Osmeña ang iyang gipasingitan. Kaniadto man god gidudahan man nga si Tomas maoy nagpaluyo og nag-finance sa vigilantes nga diin mikabat na sa sobra usa ka gatus ang gitipi nga mga kriminal. Pero sayod si Gwen kay dili man mga vigilantes kining mga nadakpan. (bobby@sunstar.com.ph)