ANG anak sa magpapatigayon nga si Debbie Yu maoy target unta diay sa mga suspek sa ambush sa Sityo Pilit, Brgy. Cabangcalan, dakbayan sa Mandaue.
Samtang gitinguha karon sa kapulisan nga usa sa upat ka mga suspek nga nadakpan ilang buhatong state witness.
Kahinumdoman niadtong Miyerkules si Yu ug iyang driver nga si Sonny Boy Mahilum maoy gi-ambush. Nakabsan sa kinabuhi niadtong Sabado sa gabii ang driver.
Niadtong Sabado nasikop sa kapulisan sa Mandaue city ang drayber sa motorsiklo nga si Orbel Inihao, taga barangay Babag, dakbayan sa Lapu-Lapu, nga maoy gisakyan sa gunman nga naila lang sa anggang Lapad ug gawasnon pa hangtod karon.
Lakip sa nasikop mao ang tulo ka mga lookout nga sila si Jayvee Palo-Palo, Rodelito Buenavista, ug ang giingong mastermind nga si Marites Velasco.
Nakuha usab ang duha ka mga motorsiklo nga gigamit sa krimen, mga armas, bala, cell phone, ug uban pa.
Si Gillamac niingon nga ang tulo pulos niangkon sa krimen nga ilang nahimo apan si Marites ang wa gyod moangkon human naestorya niini ang iyang abogado.
Matod ni Gillamac nga ang anak ni Yu nga si Raquel maoy target samtang ang mga suspek nagtuo nga ang sakay sa Toyota Fortuner nga gi-ambush mao ang anak.
Hinuon wa nila ibutyag kon unsay motibo tungod kay mismo si Velasco wa moangkon sa krimen.
Apan iyang gitataw nga nakahibawo na sila sa tinuod nga motibo apan di lang una nila ibutyag kon unsa hangtod nga di usab mosulti si Velasco.
Samtang gitinguha karon sa Mandaue City Police Office (MCPO) nga si Inihao, kinsa usa sa upat ka mga suspek nga nasikop sa kapulisan, buhatong state witness.
Si Inihao niangkon nga siya ang driver sa gunman.
Kagahapon sa buntag gipresentar sa kapulisan ang nakuhang mga ebedensiya sama sa duha ka mga armas,mga bala, kuwarta ug daghang mga cellphone
Si Inihao niangkon nga siya ang gisakyan ug gibayran siyag P10,000.
Apan siya nitataw nga ang motorsiklo iya ni Velasco ug mao usay nisugo kaniya.
Wa siya sultii kon nganong ipasusil ang magpapatigayon ug unsay motibo.
Apan sigun sa iyang nasayran ipahulga lang kini ug di patyon.
Kagahapon sa buntag nitumaw ang tension sulod sa buhatan sa IDMB human nga usa ka nagpailang Atty. Rolando Tiempo, nagpailang maoy abogado sa upat ka mga suspek gustong mokuha sa mga ebedensiya ug pagawason ang iyang mga kliyente tungod kay gisikop kini nga way warrant of arrest.
Samtang laing tension ang nitumaw human nga si Inihao nipahibawo nga mag-ilis siyag abogado samtang gipugos siya ni Atty. Tiempo pagpirmag dukomento.
Hinuon gihimakak ni Atty. Tiempo nga iya kining gipugos apan dako usab ang iyang pagtuo nga gikonbinsir na kini sa mga pulis mao nga mag-ilis og abogado.
Samtang si Chief Insp. Fernandez niingon nga tinuod way warrant ang ilang pagsikop sa upat apan nipasabot siya nga tipik lang kini sa ilang gipahigayong hot pursuit operation. (DRT)