MOKABAT 260 ka mga balay ug labing minos P8 milyunes ang balor sa gilamoy sa kayo sa sunog kagahapon sa udto sa F. Villa, Brgy. T Padilla, dakbayan sa Sugbo.
Mokabat sab sa 20 ka mga balay ang partially burned.
Lima ka mga sitio ang naapektuhan sa sunog nga didto magsugod sa Sitio La Purisima Conception, dayon nikatap sa sitio Sto. Niño, Sitio Bahaw, Sitio Puso ug Sitio Freedom.
Si Cebu City Fire Marshall Ismael Codilla nagkanayon nga ang sunog niigo mga alas 12:10 nga nagsugod sa balay ex-policeman nga patay na nga si Bartolome “Dodong” Rizol.
Ang kayo nagsugod sa ikatulong andana sa balay.
Si Codilla nagkanayon nga mokabat sa P8.5 milyunes ang ilang initial nga kwentada sa maong sunog nga nakontrolar sulod sa duha ka oras.
Ang alarma giisa sa Task Force Bravo human sa duha ka hugna nga pag-deklarar unta niini nga kontrolarado.
Apan gumikan sa pag-usab-usab sa hangin, ingon man nagbuwag-buwag ang area sa nasunogan, wala gilayon mapalong ang nagkabangis ngas kayo.
Giisa ni Codilla ngadto na sa Tak Force Bravo ang maong sunog diin ang kabombiruhan sa mga silinganang lungsod ug dakbayan.
Mga bombero gikan sa Lapulapu, Mandaue, Lilo-an, Consolacion, Minglanilla ningresponde.
Si Codilla niangkon nga naglisod sila sa pagkontrolar sa kayo gumikan sa kahagipot sa dalan sa mga iskinita sa nahisgutang lugar diin ang mga dagkong fire truck didto ra sa gawas sa kadalanan naka-standby.
Giklaro niya nga duna silay nakuhang impormasyon nga duna usay linya sa kuryente sa Visayan Electric Company (Veco) nga nagkutay sa balay sa mga Rizol agi sa terrace paingon sa kisami ang kalit lang nidilaab ug nidako og maayo ang kayo.
Hinuon ila pang ipatawag si Rosemarie Risol, biyuda sa kanhi pulis, karong adlawa diha sa ilahang buhatan aron matubag ang uban pang pasangil nga dunay nagluto sa balay.
Dunay mga residenti nga nagtinabangay sa pagkuhag tubig sa mga linya sa Metro Cebu Water District (MCWD) diin maoy gi-supply sa mga penetrator kun gagmay nga mga firetruck.
Gawas niini naglisod usab sila sa pag-kotrolar sa mga tawo nga nagkatibuwaag sa pagpanghakot sa ilang mga butang ingon man ang uban mga usesero nga bu-ot lang mosaksi sa sunog.
Si Codilla niingon nga iyang girekumendar ngadto sa mga lokal nga opisyal sa dakbayan sa Sugbu ang pagpaubos sa widening sa kadalanan sa barangay sanglit napuno sa mga estanti hinungdan nga maglisod sa pagsulod ang mga firetruck.
Si SFO2 Roylen Maratas, fire investigator sa Cebu City Fire Deperment, nikompirmar nga 200 gyud kapin ka mga balay ang naugdaw sa sunog sagad niini mga balay nga ginama sa light materials hinungdang dali kaayong gilamoy sa kayo.
Sumala pa ni Maratas, nga gika-estorya na niya ang biyuda nga si Rizol, 50, nagtrabaho sa Civil Security Unit (CSU) sa Cebu City Hall ug nadestino sa City Health Depertment labot sa impormasyon nga ilang nakuha nga didto ang sunog nagagikan sa ilang balay.
Gipadayag niya nga si Rizol nanghimakak nga didto sa iyang balay gikan ang sunog.
Ilang sutaon ang report nga sagad sa mga boarder niini mga GRO, ingon man ang report nga dunay boarders nga naghaling ginamit ang goma.
Usa ka Myrla Labides, volunteer sa barangay, ang nihatag og impormasyon sa mga tigbalita nga didto gyud magsugod ang kayo sa balay ni Rizol kay dunay naghaling og goma.
Apan kining tanan gipanghimakak ni Rizol.
Iyang giangkon nga duna siyay 10 ka mga lawak sa ilang balay apan wa na siya manawat og boarders sanglit ang namuyo niini ang iyahang mga anak.
Gibasol sa mga residenti ang kabombiruhan sanglit wa gilayon makapugong sa kayo bisan paman sa kataas sa oras nga ilang pagkutay pa unta sa mga hose sa firetuck.
Subay niini gibutyag ni SFO2 Maratas nga ang engine 10 nga fire truck naguba ug wala makaandar sulod sa 30 minutos hinungdan nga nalangay usab ang ilang pagpadagan og tubig paingon sa interior portion.
Duha ang nangaangol nga sila si Lani Florentino, kinsa samdam sa kamot, ingon man si Charlou Peliño, 23, nasamad sa agtang human maigo sa hose sa bombero samtang nag-ilugay sila sa paghupot niini pagtiro unta sa kayo. (Guam P. Logroño)