GRABENG samad sa ulo ug bun-og sa lawas ang nakita sa kapolisan sa 16 anyos nga dalagita kinsa gilabay sa sementeryo sa Camp Philips, Manolo Fortich, Bukidnon.
Giila ang biktima sa kapolisan sa Manolo Police Station nga mao si Ashelou Olivar, residente sa Agusan Canyon, susamang lungsod.
Nasayran nga nakita ang patay'ng lawas sa usa ka residente sa dapit hinungdan nga gitaho sa kapolisan ug daling girespondehan.
Sa inisyal nga imbestigasyon sa kapolisan, nakitang gipatay ang biktima tungod sa mga samad niini sa ulo nga gidudahang gibundakan og bug-at ang butang, nagmarka usab ang lagom sa liog niini nga gituohang gituok.
Walay matumbok nga responsible sa pagpatay niini apan daghan sa mga silingan ang nagtuong ang kapuyo niini maoy ni-unay sa biktima human namatikdang grabe ang away sa duha sa wala pa nahitabo ang insidente niadtong Sabado.
Wala na usab sa dapit ang kapuyo niini ning panahona hinungdan nga gipangita kini sa kapolisan.
Ang patay'ng lawas kasamtangan nga gidala sa Everlasting Funeral Homes ning panahona diin mga hingtungdan niini nanawagan sa hustisya sa kamatayon sa biktima. (SVB)