PATAY diha-diha dayon ang usa ka barangay kapitan human giatangan ug gipusil niadtong nilabay'ng adlaw sa Sitio Sinaylan, Barangay Kusina lungsod sa Talakag, Bukidnon.

Giila ang biktima nga mao si Remely Gomez, 37, minyo, barangay kapitan sa susamang dapit.

Si Police Inspector Adulfo Mercado sa Talakag Police Station nga nahinabi sa Sun.Star SuperBalita niingon nga walay kamatuoran ang nigawas nga taho nga gi ambush ang biktima kundili giatangan kini sa mga armadong mga lalaki ug gituohang giplano na ang maong hitabo.

Paingon na mogawas ang biktima gikan sa puloy-anan niadtong Domingo mga alas 5:45 sa kadlawon dihang girakrakan sa mga suspetsado hinungdan nga nakabsan.

Matud ni Mercado nga daghan nga anggulo ang ilang gitutokan niini labina nasayran nga adunay nay mga kaaway ang biktima apan personal nga rason.

Bukas usab sila sa posibilidad nga posibleng pamulitika ang hinungdan labina nga kanunay sila makadungog og mga taho kalabot sa biktima.

Nasayran nga ubay-ubay nga samad pinusilan ang naangkon niini hinungdan sa hinanaling kamatayon. Gani wala na madala sa balay tambalanan dihang gisuwayan sa mga hingtungdan niini.

Sa pagsulat ning balita, gihimo pa ang masusing imbestigasyon kalabot sa maong pagpamusil aron pag-ila sa mga suspetsado kinsa nisibat human sa insidente. (Stephanie V. Berganio)