ALANGALANG, Leyte - Namatay ang usa ka barangay kapitan samtang samdan ang asawa dihang sila gipamusil sa riding in tandem sa Barangay Cogon ning lungsod, alas 5 sa hapon sa Dominggo, Marso 17, 2019.
Giila ang namatay nga si Virgilio Vergara, 62, kapitan sa Barangay Buri ning lungsod samtang ang asawa si Corazon.
Base sa inisyal nga imbestigasyon, nagsakay sa ilang motorsiklo ang magtiayon gikan sa Buri paingon sa Cogon.
Pag abot sa nahitaboan, usa ka motorsiklo nga may duha ka mga sakay ang niabot ug gipamusil ang magtiayong Vergara.
Human sa hitabo, nisibat paingon sa Barangay Lingayon ang mga killer.
Usa ka kagawad sa Cogon ang nanawag sa kapulisan.
Naabtan sa kapulisan ang lawas sa kapitan nga naghigda ug naligo sa dugo daplin sa karsada.
Nakaangkon og daghang mga samad pinusilan sa iyang lawas ang kapitan hinungdan sa iyang hinanali nga kamatayon.
Samtang ang asawa naigo sa may wala nga dughan ug daling gidala sa tambalanan.
Nipahibawo ang kapulisan sa Alangalang sa silingang estasyon aron sa pagahimuon nga dragnet operation.