MALIPAYON kita kung may bag-ong hitabo nahitabo sa atong kinabuhi sama sa pag gradwet sa atong mga anak, pagpabunyag sa apo, paghibabot sa sakop sa pamilya nga dugay nang wala nato igkita, pag-paayo sa balay, pagkahimugso sa anak o pagkadaug og Lotto (bisan sa damgo lang). Mga ordinaryong panghitabo apan makahatag og kalagsik o bulok sa kinabuhi sa yanong katawhan. Apil na niining ang pagkahimugso sa Mandug Chapter sa Davao City Children's Alliance for Rights and Protection (DCCARP) nga may sakop nga sobra 200 ka bata. Atol sa unang adlaw sa selebrasyon sa ika 75 Araw ng Barangay Mandug niadtong Agosto 6, 2010, nihural atubangan sa mga konsehal sa syudad og opisyal sa barangay og mga halangdong bisita sa dakbayan ang mga opisyal sa DCCARP nga gipangulohan ni Rebomapil "Jim" Maranan.
Ang maong kahugpungan apil sa kampanya sa Mindanao Action Group on Children's Rights and Protection (MAGCRP) nga masanta ang abuso og kabangis sa kabataan sa atong katilingban. Nitakdo sab ang maong lakang sa mga bata nga mag-organisa sa ilang kaugalingon sa tema sa Araw ng Mandug karong tuiga nga "Nagpakabanang katawhan salamin sa tiunay nga kauswagan" tungod sa dakong papel sa mga bata og kabatan-onan sa paglambo sa katilingban. Dako sab kaayo ang kalipay ni Rose Nerez, Punong Barangay og Kagawad Richard Navales, ang gender focal point person sa barangay nga nakauna na usab ang Mandug sa pagpatumaw og mga bag-ong lideres gikan sa han-ay sa mga kabataan og nagpasalamat sa mga grupo nga nitabang sa pagtukod sa DCCARP sama sa MAGCRP, Barangay Council for Women, BCPC og SKP.
Nagpadayag usab sa ilang suporta og pagdayeg sila ni Konsehal Louie John Bonguyan og April Dayap nga kanhi SK Chairperson. Matud pa ni Dayap nga sukad masukad sa iyang pagka SK chair, karon pa siya nakadungog nga may natukod nga inter-purok nga organisasyon sa mga bata nga nagpasibaw sa ilang mga katungod og kalamboan.
Kung may organisasyon man sa mga bata, kini Barangay level og sagad alang sa kalingawan og pang-daycare og dili sa ilang katungod. Nitapos si Dayap sa iyang pakigpulong nga "saludo ako nimo Jim", nga maoy instrumento sa pagpalambo sa kahimatngon sa kabataan sa maong barangay isip focal person sa maong chapter sa DCCARP sa Mindanao.
Bata og babaye sentro sa administrasyon ni Sara.
Gibutyag ni Roberto "Robie" P. Alabado III, ang OIC sa city planning office ug Coordinator sa Country Programme for Children 6 (CPC-6) nga sentro sa bag-ong administrasyon ang bata og babaye didto sa meeting sa Inter-Agency Programme Coordination and Management Committee niadtong Agosto 6 sa Yellowfin Restaurant.
Ingon pa niya nga nailado ang Davao sa atong mga balaod, programa og serbisyo ngadto sa kabataan og kababayen-an busa gusto sa Mayor nga ipadayon og palig-onon pa kini.
Si Robie maoy mipuli kang Mario Luis Jacinto sa city planning og sa CPC-6 nga programa sa UNICEF sa Pilipinas. Nagtapok ang maong committee aron hisgutan ang implementasyon sa mga proyekto nga gisuportahan sa UNICEF karong tuiga sama sa panglawas, edukasyon, proteksyon og partisipasyon sa mga bata.