GIDAYEG sa hepe sa San Pedro Police Station ang mga pulis nga miresponde sa nahitabong pagpanulis sa usa ka tawo kinsa naunay sa iyang gibitbit nga Granada sa alas 3:20 sa kaadlawon niadtong Sabado.

Si Police Chief Inspector Ceazar Cabuhat nagbutyag nakadayeg siya sa gipakitang kaabtik sa mga pulis nga miresponde sa maong hitabo ug wa sila nakalapas sa rules of engagement.

Mga mirespondeng pulis giingon nga nagpabuto sa ilang armas human ilang nakita ang suspetsadong kawatan nga giibot niya ang safety pin sa granada ug gitakda nga ilabay ngadto sa nahimutangan sa mga pulis.

Nasayran nga ang suspetsado gigukod sa mga pulis ug mitago sa usa ka bunk house didto sa Mabini kanto Arellano Street human niya gitulis si Moczing, 17, nagpuyo sa Isla Verde, Barangay 23-C Poblacion, ning siyudad.

Si Moczing nakahimo pagtawag sa Central 911 mao nga miresponde dayon ang mga sakop sa City Mobile Group (CMG) kinsa misulay pagkombinse sa namatay nga moampo nga malinawon sa mga otoridad.

Imbes mogawas ang suspetsado, giibot hinuon niya ang pin sa granada mao nga nagpabuto ang mga pulis, hinungdan nga nahadlok ang suspek ug wa niya nalabay ang granada hangtud nga mibuto.

Maayong pagkaputol sa wala ug tuong kamot sa namatay ug nakaangkon og daghang samad sa iyang kalawasan dihang giugkat iyang patay'ng lawas sa mga operatiba sa Scene of the Crime Operatives (Soco) Region 11.

Way dokumento nga magtug-an sa pagkatawo sa namatay mao nga gipaabot nalang ang kabanay nga moila sa namatay didto sa Angel Funeral Homes, dalang F. Torres, ning siyudad.

Nakuha sa mga otoridad ang upat ka MK2 grenade gikan sa poder sa namatay ug atua karon sa kustodiya sa Bomb Squad sa Davao City Police Office (DCPO).

Si Cabuhat nagbutyag nga ilang gisusi karon kung diin gikan sa namatay ang nahisgutang mga granada ug unsa ang iyang kalihukan dinhi sa siyudad. (AD)