DUHA ka mga tawo ang napalgang patay sa mga otoridad sa duha ka managlahing hitabo ug lugar dinhi sa siyudad sa Davao.

Ang usa nakaplagan sud sa cabin sa nalunod nga barko didto sa Davao Fish Port samtang ang usa nakaplagan sud sa iyang gipuy-an nga quarter didto sa Central Park, Bangkal.

Nakaplagan sa nalunod nga barko mao si Benjie Cantoja, 29, minyo, mananagat ug nagpuyo sa Punong, Barangay Lizada, distrito sa Toril.

Si Cantoja naugkat sa alas 3:00 sa hapon niadtong Lunes pinaagi sa mga sakop sa Central 911 Urban Search and Rescue Team nga gipangulohan ni Jonathan Lugas.

Si Emely Cantoja, asawa sa biktima, nga nanguha og scrap iron sa nalunod nga Taiwanesse vessel sa lawod duol sa Davao Fish Port niadtong Agosto 1 iyang bana.

Matud ni Emely nga sukad niadtong adlawa, wa na makauli ang iyang bana mao nga nagtuo siya nga mikuyog ang namatay sa iyang mga kauban nga mananagat sakay sa lantsa sa ilang silingan.

Apan, suma ni Emely, wa gihapon mipatim-aw ang biktima dihang nakauli ang lantsa, mao nga nagtuo sila nga nalumos ilawom sa barko hinungdan nga nangayo sila og tabang sa Central 911.

Ang patay'ng lawas sa biktima atua karon gihaya sa Angel Funral Homes human nila naugkat sud sa cabin sa nalunod nga barko.

Mga operatiba sa Scene of the Crime Operatives (Soco) Region 11 naglusad karon og makuting imbestigasyon aron sayron kung wa bay laing tawo nga nagtinguha sa kamatayon sa biktima.

Samtang naugkat sab sa kapulisan sa alas 4:00 sa kaadlawon kagahapon ang patay'ng lawas ni Bryan Soriano, 18, lumad nga taga Binay, Magpet, North Cotabato sud sa iyang gipuy-an sa Santos Marketing, didto sa Yakal Street, Central Park.

Si Soriano namatikdan sa iyang kauban nga si Carmelo Aballe nga wa na magginhawa mao nga nangayo siya og panabang sa kapulisan aron dalahon ang biktima sa tambalanan.

Paghiabot sa mga paramedics sa Central 911 gideklara nga patay na ang biktima ug gituohan nga namatay siya tungod sa cardiac arrest.

Mga kauban sa biktima nagbutyag nga ilang namatikdan nga daghan kaayo og gikaon ang biktima nianang pagkagabii mao nga nagtuo sila nga giurom ang biktima ug namatay. (AD)