GIDAYO sa libuan ka mga tawo ang miturok nga uhong o giant mushroom didto sa probinsiya sa Cotabato.
Matud ni Ricky Tampil nga nangita siya og ligbos sa ilang uma sa diha nga iyang nadiskubre ang dako kaayo nga uhong duol sa punuan sa Narra.
Halos dili makatuo si Tampil sa iyang nakita ug gibati siya og kahadlok nga ibton ang punuan sa uhong kay basin unya makahilo kini kon iyang lutuon o kaha dunay nagpuyo nga duwende.
Ang giant mushroom dunay gilapdon nga 16 diameter, dako pa sa nigo, unya taga tuhod sa tawo ang gitas-on. Usa lang ka punoan apan nagbaton og 15 ka mga sanga.
Gikatingala sab sa katawhan gumikan kay nag-aso ang punuan sa uhong ug hangtud karon wala pa gyud kini nalarag.
Dali kining gipahibalo ni Tampil sa iyang mga silingan ug mga barangay opisyal hinungdan nga gitahasan ni Midsayap Mayor Manuel Rabara ang Municipal Agriculturist Office aron sutaon kon makaon o dili ang uhong.
Posible sab nga maapil kini sa World Guinness of Record kay sa mga nakit-ang uhong sa Pilipinas mao kini ang pinakadako ug talagsaong klase.
Gikakurat sab sa mga molupyo ang maong tanum gumikan nakit-an sa gikuhang hulagway sa mga barangay opisyal ang mga gagmay nga tawo nga mora og duwende. (Edgardo Fuerzas)