GIKABALAK-ANG mas mosaka pa ang gidaghanon sa 844 ka mga natakbuyan sa kasong dengue human sa sagunsong pagbundak sa kusog nga uwan dinhi sa probinsiya sa Davao del Sur.

Gumikan niini, nakig-alayon na ang Provincial Health Office (PHO) ngadto sa mga opisyales sa matag barangay aron paningkamutang sumpoon ang pagkuyanap sa sakit nga dengue.

Si Dr. Azucena Dayanghirang, provincial health officer, nitataw nga hugtanon nilang gibantayan ang tanang ospital ug klinika sa lalawigan aron masuta kon nadugangan na sab ang dengue niining buwan sa Agosto.

Gi-awhag sab ni Dayanghirang ang mga barangay kapitan nga motabang pagsulti sa ilang katawhan sa barangay nga mamnglimpyo gyud sa palibot.

Pagbungkag sa mga hayan gipundohan sa lamok maoy nag-unang target sa PHO aron di sila makapangitlog bisan asa.

Ang Davao del Sur gipailawom sa state of calamity human nga 13 na ang namatay sukad buwan sa Enero ug halos kada adlaw nga adunay madala sa bay tambalanan.

Ang kagamhanang probisiyal nipagawas na sab og ayuda alang sa mga pamilya nga natakbuyan sa sakit nga dengue.

Matod ni Dayanghirang nga wa pay tambal nga makaayo sa maong sakit apan hayan matabang pa kon masayran og sayo ug madala dayon sa ospital. (Dondon Dinoy)