DUHA ka mga tawo nga nagsugal og baraha nadakpan sa kapulisan didto sa lungsod sa Sta. Cruz, Davao del Sur.

Nasikop ang mga suspek nga mao sila si Emma Escabarte, 28, lumolupyo sa Sitio Lower Quinokol ug Marcelo Soriano, 36, taga Sitio Landing, Barangay Darong, ug pulos sakop sa maong lungsod.

Nangulo si Senior Inspector Alfredo Santillana, hepe sa kapulisan, pagsikop sa mga suspek human naaktuhang nagsugal og baraha sa duwang "tsikicha" pinaagi sa pagpusta og kuwarta.

Sumala ni Santillana, mga alas 12:30 ang takna sa kaudtuhon, Lunes, mga suspek nakit-ang nagsugal sa overland terminal sa Crossing Quinokol, Barangay Darong. Nakuha gikan sa ilang posisyon ang salapi nga balor P63.00.

Mga suspek giingong mag-atubang og kasong paglapas sa illegal gambling didto sa korte ug gikostudiya na sa kapulisan.

Luyo niini, padayong nagpatara ang mga dagkong financier og Last 2 sa lalawigan diin nagmuntar og puwesto sud sa mga merkado publiko.

Apan ang kapulisan nanakop og mga gagmay'ng ushers sa Last 2 sa tibuok kalungsuran.

Apan sa gipaabot nga taho sa Superbalita sa usa ka wa magpailang tinubdan, nagkanayon nga way bisan usa nga nadakpan ang Bansalan Police Station bisan pa man og naglinya ang mga nagpataya og Last 2 sud sa ilang merkado.

Tataw ang kampanya ni Presidente Benigno Aquino III nga sumpoon ang mga illegal nga pasugal sa tibuok nasud. Nagpaguwa sab og direktiba si PNP Chief General Jesus Versoza, nga tumanon ang mando.

Una nang nialma ang pipila ka mga gagmay'ng ushers nga naligsan sa gihimong ronda sanglit alang nila dili patas nga gagmay ra ang gisikop.

Si Davao del Sur Governor Douglas Cagas nanguna sa pagsaway sa mga lokal nga opisyal ug hepe sa kapulisan kalabot sa pagkuyanap sa Last 2 sa Davao del Sur.

Alang ni Cagas, di masulbad ang Last 2 ugaling nagdawat og protection money ang pipila ka mga opisyal sa pulis ug adunay pagtugot sa lokal nga gobyerno.

Nagdumili pagluwat og komentaryo si Senior Superintendent Ronald dela Rosa, provincial police director, kalabot sa alegasyon sa gobernador nga hayan naka-kuwarta ang uban niyang ginsakpan.

Usa sa mga nasikop sa kapulisan, nitataw nga ang ila rang koleksyon ang gikuha sa ilang posisyon ug hayan sila gisikop sanglit wa sila makahatag og ekis sa pipila ka mga naka-uniporme.

Gihagit ni Cagas ang mga nahisgutang ahensiya nga ipakita ang tinud-anay ug way gipili nga pagpanakop.

Ang sugal nga Last 2 nga gikuha gikan sa resulta sa Philippine Lotto Draw, matod pa, gisaligan sa mga yanong katawhan aron sila makapalit sa ilang panginahanglanon tungod sa krisis sa panahon. (SuperBalita)