SUGOD sa sunod season, hingpit na diay nga mobiya ang Purefoods Hotdogs sa PBA.

Kini human ang kompaniya napalit na og lain nga tag-iya kinsa way interesado nga mosalmot sa professional basketball league sa nasod.

Gikan sa San Miguel Corp., ang Purefoods karon gipanag-iya na sa Del Monte Pacific Ltd. nga gipangulohan ni Jose Yao Campos ug sa Century Pacific Group of Companies ni Ricardo Po.

Updates on President Benigno Aquino III's presidency

Ang tinubdan mibutyag nga 100% sa Purefoods ang gipalit gyud sa maong grupo, gawas lang sa basketball team niini.

Sa ato pa, ang SMC mao gihapon ang nanag-iya sa franchise sa Purefoods ug posibling magpabilin kini sa PBA apan magdala na unya kini og laing nga ngalan.

Sa niaging season, ang B-Meg Derby Ace Llamados, usa ka produkto nga pagkaon alang sa mga hayop, maoy gidala sa maong team ug basin magpabilin gihapon kining maong ngalan o ba kaha ilisan.

******

Mikatap na usab karon ang huhungihong nga tingali og mobiya na si coach Ryan Gregorio sa Derby Ace team.

Wa man tuoy katinu-an ang tanan, apan matod pa sa tinubdan, nga si Gregorio maoy posibling kuhaong coach sa bag-o na unyang Meralco team sa PBA.

Ang Meralco maoy nakapalit sa franchise sa nadisbanded nga Sta. Lucia Realty.

Si Gregorio, matod pa, nga gawas nga tanyagan og lima ka tuig isip headcoach, sa samang higayon, aduna usab siyay managerial position sa kompaniya.

Sa gikaingon ko na, wa pay katinuoan ang tanan, apan kinsa bay makabalibad sa maong tanyag?

Si Ryan igsuon ni Patrick “Pato” Gregorio, usa sa mga top executives sa RP Gilas team nga gi-bank roll ni business tycoon Manny V. Pangilinan kinsa mao usab ang tag-iya sa Meralco team.

******

Ning bag-ohay lang, isip kalihukan sa ilang kapistahan, malampuson na usab nga gipahigayon sa negusyanting si Jerry Oberes inabagan sa mga opisyales sa barangay ang 3rd Emil’s Cup basketball open sa Brgy. Lipata, lungsod sa Minglanilla.

Barangay ra man tuod, apan matag gabii, grabi ka dasok sa mga tawo ang motan-aw sa mga duwa nga gisalmutan sa mga local ug commercial players sa Sugbo.

Sama sa ubang lungsod, fanatics sab diay kaayo ning taga Minglanilla og basketball.

Pero ang akong gikahibugngan, kon nganong di man makapahigayon og mga susama niining torneyo ang opisyal mismo sa maong lungsod o kaha intertown tournament sama sa gihimo sa uban.

Kaanindot unta sa ilang sports complex kon itandi sa ubang lungsod. Aduna pa gani kini oval, tennis ug badminton courts unya dako pa gyud og parking area.

Pero maghinangat gani ang piyesta, wa gyud ta kadungog og dunay kalihukan sa natad sa paugnat sa kusog. Lahi sa ubang lungsod nga dunay boxing, lumba sa dagan, basketball, ug uban pang mga sporting events.

Kini maoy akong hagit sa mga konsehal ug mga opisyales sa Minglanilla. Paghiusa mo sa pagpalambo sa natad sa paugnat sa kusog, kay mao ra ba usab kini gusto ni Cong. Eddie Gullas.

(junmigs0622@yahoo.com)