GIPAKAGING sa Smart Gilas Pilipinas ang defending champion Jordan, 75-71, kagahapon sa 3rd FIBA Stankovic Cup sa Beirut, Lebanon.
Ang Pilipinas nakasandig gyud og maayo sa gidak-on ni Asi Taulava, kinsa nipugnit og 12 ka rebounds ug nakatabang gyud og dako sa depensa.
Ang Pilipinas naggunit na karon og 2-1 nga rekord samtang ang Jordan nahagbong sa 0-2 nga baraha.
“He (Taulava) has definitely added size. He’s responded well to the team not too bad. I think we can look at using him in the long term too,” matod ni Philippines coach Toroman Rajkov nga nakuha sa official website sa kompetisyon.
Sa opensa, gipangulohan ni Marnel Baracael ang mga Pinoy pinaagi sa iyang 16 puntos, nidugang og 13 puntos si Chris Tiu samtang niamiot og 12 puntos si Mark Barocca.
Ang Jordan gipangulohan ni Rasheim Wright pinaagi sa iyang 17 puntos.
Alang kang Jordan coach Mario Palma, wala ra kaayo’y bili ang kapildihan, ang importante alang kaniya nga mabuhat gyud unta nila ang angayan nilang buhaton.
“Such defeats don’t really matter. What we have to introspect is, if we did what we expected to do right,” Palma.
“I think our outside shooting has been very bad so far.”
Ang Jordan igo lang nakapasulod og lima sa 28 nila ka pagsuway sa three-point area.