KON dili man gani mapatumba ni Donnie “Ahas” Nietes (26-1-3, 15KOs) ang iyang challenger nga si Mexican Mario Rodriguez (10-5-3, 7KOs) karong Agusto 14 sa Mexico, madaog gyud gihapon sa Pinoy ang tanang rounds sa ilang engkuwentro.

Mao kini ang gibuhiang pangagpas sa chief trainer sa ALA Promotions nga si Edito Villamor sa interbyu sa Filipino Journal.

Gipasabot ni Villamor nga plano gyud nilang dominahon og maayo ang away aron dili makalusot ang posibilidad nga hometown decision.

Updates on President Benigno Aquino III's presidency

Matod ni Villamor nga bisan ikatulo na kining higayon nga modepensa si Nietes sa Mexico, gibati gyud gihapon siya og gamayng kulba apan dako ang iyang pagsalig nga molampos gyud si Nietes.

Kon modaog si Nietes, hayan mapatik siya sa kasaysayan sa Philippine boxing isip usa sa labing dugayng naggunit og world title sunod nila ni Luisito Espinosa, Jesus Salud, Pancho Villa, ug Flash Elorde.

Dako man tuod ang iyang pagsalig nga modaog si Nietes apan gitataw ni Villamor nga dili gyud kakompiyansaan si Rodriguez bisan aduna na kini lima ka mga pilde.

Matod ni Villamor nga dili mogasto og dako ang mga nagdumala kang Rodriguez kon wala kini igong ikabuga.

Sa laing bahin, gipahibalo ni Villamor nga aduna na sab gyu’y fans si Nietes sa Amerika ug iya kining napamatud-an dihang nag-ensayo sila sa Wild Card gym ni Freddie Roach.

Matod ni Villamor nga aduna’y daghang magpakuha og hulagway kauban si Nietes, kadaghanan niini mga Pinoy nga nagpuyo na sa Amerika ug aduna sa’y mga langyaw.