SA usa ka pagpamilok mahimong mahanaw ang tanan, ang tanan nga materyal nga bunga sa atong pagpaningkamot, usahay tibuok kinabuhi nga pagpaningkamot. Kini ang bitbit sa sunog o sa kalamidad nga mohasi kanato matag karon ug unya.

Dili nato matino ang sunod nga panghitabo. Apan dunay mga butang nga dili matay-og ni maguba sa bangis nga hampak ug sungog sa kapalaran, ug kana mao ang makanunayong pagmahal sa atong pamilya ug sa atong isigkatawo.

Updates on President Benigno Aquino III's presidency

Way usa kanato ang makapangangkon nga hingpit niyang gibati ang gibati sa mga biktima sa unsa mang kalamidad, kay sud sa kasingkasing ug hunahuna sa atong isigkatawo dunay mga lugar  sa kasakit nga bisan kanus-a dili nato mabisita. Wa hinoon kini magpasabot nga wa kitay ikatampo aron mahupay ang ilang mga kasakit.

Napamatud-an na nato kaniadto sa makadaghang higayon sa nagkalainlain nga lugar. Subli natong pamatud-an, ug ning higayona ngadto sa mga biktima sa dakong sunog niadtong Lunes, Agusto 9, 2010 sa F. Villa, T. Padilla ning atong dakbayan.

“Unsa may ako matabang, utro man sab kong tabangonon?” maoy sagad nga balibad sa uban. Apan kung ato lang unta lingion ang atong palibot kita makaamgo nga bisan ang uyamot dunay ikahatag. Ang tinood nga buhat sa kaluoy, matud pa, dili ang paghatag tungod kay niawas na sa kadaghan ang imong bahandi kondili ang paghatag lang gihapon bisan unsa gamay ang anaa nimo. 

Apan wa na tingali mas law-ay pa kay sa pagdumili paghatag bisan nisawom ka na sa bahandi. 

Sa atong mga mata, ang pagkaugdaw lamang sa panimalay maoy  atong makita. Apan dunay dili diretso makita sa atong mga mata. Ang matag dagkong sunog sa dagkong komunidad mosamad sa kanindot sa panagsinilinganay tungod kay magkatibulaag na man unya ang mga silingan, mamuyo sa laing lugar ug mo-adjust na usab sa bag-ong palibot. Gawas lang tingali kung sa mao lang gihapon nga lugar makabalik sila ug tukod ug panimalay.

Ang katungod nga makabaton ug kaugalingong pinuy-anan usa ka batakan nga tawhanon nga katungod. Katungod dili pribilihiyo. Wa kini kalainan sa edukasyon, pagkaon ug uban pa. Dako ug papel ang gobyerno aron makab-ot o mabatonan kini sa tawo. Usbon ko, makab-ot, kay wa ko miingon nga isalig na lang nato sa gobyerno ang tanan. Ehemplo: Kung atong mga mamumuo pabiling magdawat ug suhulan nga maguwang lang sa limos, lauman mo ba nga lamian ang pagkaon sa ilang lamesa o nga dali sila makapanag-iya ug kaugalingong lote?

(birada_ruphil@yahoo.com)