LAING dakong sunog ang niigo sa Sitio Freedom, Barangay T. Padilla, siyudad sa Sugbo niadtong Lunes.

Di mominos 250 ka mga balay ang naugdaw ug kapin sa 1,500 ka mga pamilya ang nawad-an og pinuy-anan. Gibanabana nga P8.5 milyunes ang danyos sa sunog.

Ikaduha kining dakong sunog nga niigo sa dapit sukad niadtong Marso 2004, diin dul-an sa 500 ka mga balay ang naugdaw.

Updates on President Benigno Aquino III's presidency

Sa sunog sa miaging adlaw, ang kabomberohan nakasugat sa samang problema sa unang sunog – ang kagamay sa dan ug kahagip-ot sa kabalayan nga ginama sa light materials.

Ang maong problema nakomplikado tungod sa kahimtang sa panahon sama sa kainit sa adlaw ug kakusog nga hangin.

Way kontrol ang tawo sa kahimtang sa panahon apan, ang nag-unang duha ka mga problema pwedeng mapangitaan og solusyon lakip mismo sa paglikay sa pag-ulbo sa sunog.

Ug sa matag kasinatian, kinahanglan nga dunay makutlong leksyon. Wa kita mag-ampo nga masunog na usab ang maong dapit sa umaabot apan mas bentaha nga mangandam.

Karong mihinayhinay na sa pagtukod og balik sa ilang balay ang mga biktima sa sunog, maayong makonsiderar nang daan ang igong dan ug mahan-ay ang kabalayan.

Ang kahugpongan sa mga lumolupyo uban sa mga opisyal barangay maayong magtuki ug magkasabot bahin sa pagtukod sa kabalayan.

Ang komitiba sa housing ug urban poor sa konseho sa dakbayan dunay dakong papel ug kaakuhan sa pagpahan-ay sa dapit.

Kon wa kitay makutlong leksyon sa miaging katalagman ug paghimo og tukma nga aksyon, ang mga lumolupyo sa dapit kanunay nag-atubang sa dakong risgo.