GIHUKMAN sa korte nga mabilanggo sud sa 20 ka tuig ang usa ka bugaw nga nagbase sa Brgy. Kamagayan, dakbayan sa Sugbo human namatud-an nga iyang gibaligya ang menor de edad alang sa prostitusyon.
Gawas sa pagkapriso, nimando usab si Regional Trial Court (RTC) Branch 14 Judge Raphael Yrastorza Sr. nga si Shirley Casio momulta og P1 milyon nunot sa insidente niadtong 2008.
Si Casio gitumbok nga nakalapas sa Republic Act (RA) 9208 kun trafficking in person dihang iyang gibaligya si Jane (tinuod nga ngalan gipugngan) sa kantidad nga P500 apan ang kapulisan diay nga nagpahigayon sa operasyon ang iyang kustomer.
Dihang gipahigayon ang operasyon batok sa suspek gipaluyohan sila sa Department of Social Welfare and Development (DSWD) ug sa International Justice Mission (IJM).
Niadtong Marso 3, 2008, ang duha ka mga “decoy” nga pulis giingnan ni Casio nga “chicks mo Dong?” ug dihang gipangutana kon bag-o kini, nikompirmar siya uban sa pag-ingon nga P500 ang bayad niini.
Gidala si Jane sa usa ka motel apan diha sa pikas kwarto ang mga pulis hinungdan nga gi-rescue siya samtang gisikop si Casio sa kapulisan uban sa social worker sa DSWD ug mga representante sa IJM.
Sa iyang bahin, si Casio kusganong nihimakak sa pasangil bisan nipakanaog nag hukom ang korte. (JECT)