MGA biktima sa sunog sa Barangay T. Padilla, dakbayan sa Sugbo nanawagan sa Cebu City Hall sa pagpalagpot kang Fire Marshall Esmael Codilla.
Gihulagway sa pipila ka mga residente nga way kabangkaagan ang opisyal sa pagdumala sa fire fighting hinungdan nga gilamoy ang 250 (di 260) ka mga balay nga nakaapekto sa 1,500 ka mga residente.
Si radio reporter Paul Lauro, biktima usab sa sunog, personal nga nisugyot ngadto ni Codilla atol sa pag-ulbo sa kayo nga sugaton sa pagpawong ang kayo sa dihang 150 metros pa ang gilay-on sa kayo sa ilang balay.
Apan giangkon ni Codilla nga gumikan sa kahagip-ot sa F. Villa ingon man ang kakuwang sa ilang kahimanan, wa nila matabang sa pagpawong ang nag-ulbo nga kayo.
Matod pa ni Codilla nga andam siya nga mopaubos sa imbestigasyon human gikuwestiyon ang iyang pagdumala.
Samtang si Cebu City Mayor Michael Rama nakasaway usab sa performance sa kabomberohan, ilabi na ang gigamit nga kahimanan sama sa busloton nga fire hose hinungdan nga hinay ang pressure sa tubig nga ibuga.
Atol niining pagsuwat ang kagamhanan sa dakbayan sa Sugbo pinaagi sa City Social Welfare niapod-apod na og packed meals ug nag-andam aron kahatagan og construction materials ang mga biktima. (FVQ)