8 nahilo, 2 namatay; mabdos nagrabehan

DUHA ang nangamatay ug unom pa ang nagpabilin sa tambalanan, usa niini mabdos nga naa sa kritikal nga kahimtang human nangahilo ang ilang pamilya nga nangaon sa ilang gilutong butete niadtong Domingo sa gabii sa Brgy. Cabutongan, lungsod sa Santander, Sugbo.

Si Rolando Tano, 48, biyudo,mangisida, nagpuyo sa nahisgutang barangay, namatay diha-diha gilayon human makakaon sa butete samtang dead on arrival sa Oslob District Hospital si Alejandro Cuerpo, 51, minyo, brgy. Tanod.

Ang anak ni Tano nga Airene, 19, mabdos, naa sa kritikal nga kahimtang.

Naa sab sa ospital ang iyang manghod nga si Loie Jay Tano, 13. Ang anak ni Cuerpo nga si Algie, 28, minyo, naospital sab kay nahilo.

Laing nangahilo mao ang ilang mga paryente nga sila si Salvador Base, 48; Baldomiro Base, 69; ug si Reymond Base, 16.

Si PO1 Roel Gerodias, desk officer sa Santander Police Station nga nahinabi sa Sun.Star Superbalita, nagkanayon nga alas 6:00 sa gabii niadtong Dominggo nangaon ang mga biktima og dakong butete nga motimbang sa lima ka kilo.

Matod pa ni Gerodias nga ang butete nakuha ni Tano ug gilimpyuhan niini didto pa sa dagat sa wa pa niya dad-a sa ilang balay ug giluto uban sa pamilya ug mga paryente.

Apan pagka-alas 10: sa gabii sa samang adlaw nakabatig sakit sa ilang tiyan, paglipong-lipong ang mga biktima.

Si Rolando maoy namatay diha-diha, samtang si Cuerpo gidali sa pagdala sa tambalanan uban sa laing unom ka mga biktima apan gideklatrar sa mga doctor nga DOA.

Si Gerodias niingon nga si Airene, kinsa buntis, gi-oxygen pa sa Vicente Sotto Memorial Medical Center (VSMMC) gumikan kay naggrabihan sa hilo sa isda.

Nagpabilin usab sa maong tambalanan ang iyang lima pa ka mga kauban.

Gipadayag niini nga sa wa pa mangaon sila si Rolando, giingong nag-inom pa sila ug nangagda sa ilang ubang mga higala nga mangaon og butete nga nindot kaayong sumsuman.

Sumala pa ni PO1 Gerodias nga basi mga nakasaksi sa wa pa mamatay ang biktima,giapil sa pagluto ni Rolando ang bihod sa butete ingon man tambok niini hinungdan nga nagtuo sila nga dunay naapil nga hilo sa isda.

Wa hinuon nila isakway ang posiblidad nga dunay mga parte sa lawas sa butete nga nataligam-an sa pagkuha ni Rolando hinungdan nga kumpiyansa kaayo.

Giingong kabisado na kaayo ni Rolando ang pagpanguhag butete ingon man pagluto niini.

Ang isda nakuha sa usa ka “bobo” nga klase sa panagat apan seguro gidali-dali niini sa paglimpiyo ug posibling dunay nahabiling hilo sa isda.

Dugang niya nga kusog gyud mangaon og butete ang mga tawo sa lugar ug mao niy usa ka kinaham nilang matang sa isda nga kan-unon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph