TULO ka samad pinusilan ang naangkon sa usa ka lalaki human giatangan ug gipusil niadtong Martes mga alas 10:00 sa gabii sa Patag, ning siyudad sa Cagayan de Oro.

Giila ang biktima nga mao si Paterno Cabasa, 49, minyo, taga lungsod sa Opol, Misamis Oriental.

Nasayran gikan sa paryente sa biktima nga pauli na sa lungsod sa Opol ang biktima sakay sa kaugalingon motorsiklo dihang paghidangat sa Patag nga bahin ning siyudad kalit lang nga giatangan sa mga armadong lalaki ug deretsong gipusil.

Maayo na lamang dili kay fatal area ang naigo sa biktima. Samad sa paa, bukton ug braso ang samad sa biktima kinsa nahulog ug naligid gikan sa iyang motorsiklo human sa pagpamusil.

Giingong adunay nakakita nga nagsul-ob og bonnet ang mga suspetsado apan wala matino ang armas ninii ug sakay sa motorsiklo nga walay plaka.

Ang biktima human nagbuy-od dali nga gidala sa Northern Mindanao Medical Center ug padayon pa nga giobserbahan ning panahona.

Wala matino nga motibo sa pagpangluthang labina nga naila si Cabasa nga mayo nga tawo.

Si SPO2 Fernando Laspo¤a sa Police Station 4 (PS4) sa Carmen nibutyag sa Sun.Star Superbalita nga ang insidente wala mataho kanila apan padayon pa nga gi-follow up labina gyod ang pagtino sa motibo sa pagpangluthang.

Sa pagsulat ning balita nagpabilin pa sulod sa emergency room si Cabasa nga giatiman sa mga doctor. (Stephanie V. Berganio)