USA ka dyip pasaheroan ang gitulis sa duha ka mga lalaki niadtong Martes sa gabii.
Nireklamo sa Police Station 2 (PS2) sa Cogon ang mga biktima sa pagpanulis mga alas 10:00 sa gabii sa Capt. V Roa St., ning siyudad.
Ang Bugo Liner nga gimaneho ni Timoteo Gabule ang gisakyan sa duha ka mga tulisan ug giunay pagtulis ang mga kasakay nga mao sila si Hygia L. Canios, 20, dalaga; Karlan Loch C. Oco, 21, taga Carmen ning siyudad ug Ana Primero, 23, taga Agusan ning siyudad.
Ang mga suspetsadong tulisan naila nga sila si Gary Doroy, 21, ulitawo ug usa ka Ian, taga Bulua ning siyudad.
Maayo na lamang nalabyan niadtong gabhiona sa kapolisan sa PS2 atol sa pagpatrolya hinungdan sa pagkasikop sa usa sa suspek apan nakasibat ang giilang si Ian.
Nagtingkagol sa Maharlika Detention Cell ning panahona si Doroy kinsa nakatakdang pasakaan og kasong pagpanulis ug illegal possession of bladed weapon human nakumpiska gikan sa kamot niini ang 12 ka pulgada nga kutsilyo nga maoy gition sa mga pasahero.
Gawas sa pagpanulis anaa usab ang kaso sa pagpanglabni human nireklamo sa Police Station 1 (PS1) sa Divisoria ang usa ka dalaga nga mao si Cherrylane M. Naconada, 23, dalaga, taga Xavier heights ning siyudad ug nagpatabang human gilabni ang iyang bag niadtong Martes mga alas 9:00 sa gabii sa Yacapin St., ning siyudad.
Sulod sa bag ang mahalon nga cellphone mobalor ug P10 mil, nakuha usab ang cash niini mobalor og P5 mil uban sa mga personal nga gamit.
Ang kaso karon gisunod na sa kapolisan sa PS1 aron pag-ila sa mga suspek.
Samtang biktima sa pagpangransak ang panimalay ni Gonzalo M. Cagadas, 54, minyo, taga Zone-3, Basak., Macasandig ning siyudad.
Gisaysay sa biktima sa PS2 sa Cogon nga nadiskubre na lamang niya kagahapon sa buntag nga naguba na ang ilang terasa nga maoy gihimong dalan sa kawatan.
Nakuha sulod sa ilang panimalay ang usa ka laptop, DVD, PSP nga gibana-banang mobalor tanan og P40 mil. Aduna pay uban mga personal nga gamit ang nakuha apan wala na nahibaloan ang mga kantidad niini.
Gidudahan sa tag-iya nga usa ka Junax Nacabalan ang responsible sa pagpangransak apan padayon pang gisuta sa kapolisan. (Stephanie V. Berganio)