Gibati na usab karon og kabalaka ang mga ginikanan ug mga kabataang estudyante sa planong pagpatuman sa dugang tuig nga ang-ang sa elementarya ug sekondarya (high school).

Desidido na ang rehimeng Aquino nga ipatuman ang nahisgutang sistema tungod kay kulang kuno kaayo sa kahibalo ang mga Pilipinong estudyante bisan og mogradwar kini sa kolehiyo...nga kuno bisan simpleng komposisyon gamit ang Inengles di kini makahimo.

Sekondaryang lingwahe sa mga Pilipino ang pinulongang Ingles tungod kay sugod pa kaniadto apil na kini sa kurikolum sa atong mga tunghaan.

Buot ipasabot, tanang mga nagtungha makasabot og Inengles, apan ang uban kanila dili maayong motukod og simple sentence ug kon mahibalo man sayop ang gitawag nga grammar.

Sa laktod, dayag kaayo nga usa ra ka tumong ang gitinguha karon sa Departamento sa Edukasyon ug kini mao nga ang tanang estudyante hanas sa pinulongang Ingles. Kini ang hinungdan nga dugangan og tuig sa maong departamento ang ang-ang sa pagtungha.

Nindot ang plano kay daghan gayud kanatong mga Pilipino ang nakabaton og pagsalig sa kaugalingon ug magmalampuson sa kinabuhi tungod kay hanas

kaayo sila sa pag-Iningles.

Pangutana nako karon, unsa may tumong sa atong kagamhanan? Mahimo tang tanang English-speaking citizen? Sa ingon niini ba nga paagi mo-asenso ug masulbad ang sulirang kurapsiyon sa Pilipinas?

Gawas sa migamit og Iningles nga mga nasud, sama sa Amerika, England ug uban pa, sama ba sila kanato kakabus?

Lantawon ta kuno ang China, South ug North Korea, Vietnam, Japan ug samang mga nasud, lig-on ba ang ilang Iningles? Dali ra kaayo kining tubagon og "DILI", di ba?

Mangutana ta sa nagtukmod ini nga plano, makapasalig ba sila nga kon magmalampuson sila, okay na ba ang kahimtang sa mga Pilipino?

Alang kanako, makapasamot lamang kini og kaut-ot sa kahimtang sa mga Pilipino, kay alang kanako dili importante nga hanas kang mo-Inglis aron ka mahaw-as sa kalisod.

Si Congressman Manny Pacquiao, dunay abilidad walay grado, apan sa dihang mi-asenso diha pa siya mitiwas og tungha, apan bisan Binisaya ang Iningles niya, ang tibuok kalibutan naminaw tungod kay dili ang iyang sinultihan maoy gipaminaw apan ang iyang abilidad.

Ang akong baruganan, pundasyon sa bata ang pakusgan, dili ang pagdungag og tuig sa pagtungha. Pinoy himuong Kano ni P-Noy? Oh my God!

Alang sa imong sugyot ug komentaryo sulat lang sa amcorphil.leo@gmail.com. Paminawa ko sa dxRD, commando 711 matag alas 6:00-8:00 sa buntag.