DILI kaha matintal si Presidenti Noynoy Aquino sa hanyag nga paliton ang Philippine Gaming Corporation sa kantidad nga 10 bilyon dolyares? Gawas niini, adunay pasalig nga mahimo ang Pilipinas nga 'Tiger economy".
Ang Pilipinas dugay na nalumos sa dakong utang sa mga langyawng patigayon ug ang maong utang nagpadayon og dako inay nga mogamay.
Daghang mga proyekto nga gihunahuna si Presidenti Aquino apan ang iyang suliran diin mokuha og salapi nga gastuhon.
Niadtong miaging semana, ang adunahang si Ramon Ang naghanyag nga paliton ang gipanagiyahan sa kagamhanan nga Pagcor sa kantidad nga 10 bilyones dolyares. Matud ni Ang nga kauban niya sa pagpalit ang iyang mga higalang Malaysians nga pulos sab adunahan.
Ang Pagcor nagpanuigon na og 33 anyos ug adunay 13 ka mga casino nga nagkatag-katag dinhe sa nasud, usa niini nahimutang dinhi sa siyudad sa Davao.
Dunay pasalig si Ang nga sa higayon nga ilang mapalit ang Pagcor, ang Pilipinas mamahimo na nga 'tiger economy' ug malabwan niini ang Thailand.
Usa kini ka hanyag nga lisud palabyon karon nga ang nasud nagpait tungod kay way sud ang kaban.
Kun mahalin ang Pagcor, daghan ang magmasulob-on. Kini mao ang mga tawo,
apil na ang pipila ka mga politiko, nga naghimo sa maong ahensiya nga ilang gatasan.
Sa laing bahin, dako ang bintaha kun ibaligya ni Aquino ang Pagcor. Way pay negosyo nga gigunitan sa kagamhanan nga wa nagsalimuang tungod sa daghang problema, usa na dinhi ang kurapsiyon.