14 ka MILF misurender sa militar sa Maguindanao

KATORSE ka mga miyembro sa Moro Islamic Liberation Front (MILF) ang misurender sa militar sa probinsiya sa Maguindanao.

Gibutyag ni 603rd Brigade Commander Colonel Ernesto Aradanas nga mitahan sa iyang mga ginsakpan sa siyudad sa Cotabato ang 14 ka mga miyembro sa MILF nga gipangulohan ni Tannie Masapi alyas Kumander Tawan-Tawan sa 108th Base Command.

Si Masapi uban ang iyang mga sakop pulos nagalihok sa Barangay Damakling, Datu Paglat, Maguindanao.

Dala sa mga rebelde sa ilang pagsurender ang mga pusil ug mga bala nga gipailalom sa Balik Baril program sa gobyerno.

Apan giklaro ni MILF Military Spokesman Von Alhaq nga walay Kumander Tawan-Tawan sa 108th Base Command sa ilang organisasyon ug posibling mga nahabiling sakop lang sila sa mga Private Armed Group sa Maguindanao.

Gidugang ni 6th Infantry Division Chief Colonel Benjamin Hao nga miyembro sa MILF si Kumander Tawan-Tawan ug mibalik sa sabakan sa balaod gumikan kay gikapoy na sila sa pakigbisog batok sa gobyerno ug ilang mga opisyal lamang ang nabulahan.

Gipasalig sab ni Hao nga makadawat og hinabang gikan sa kagamhanan ang grupo ni Tawan-Tawan aron ilang magamit sa ilang panginabuhi uban sa ilang mga minahal sa kinabuhi. (Edgardo Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph