GIALERTO na sa Davao del Sur Provincial Police Office (DDSPPO) ang kapulisan matag kalungsuran aron masigurong luwas ang probinsiya gikan sa mga nagkadaiyang ilegal nga sa druga.

Human nakasulod ang "cocaine" sa siyudad sa Davao nga giingong gikan sa probinsiya sa Sultan Kudarat, daling gialarma sa DDSPPO ang kapulisan sa matag lungsod sa Davao del Sur.

Ang probinsiya maoy agianan sa mga sakyanan gikan sa North ug Central Mindanao padung sa dakbayan sa Davao. Gumikan niini, di buot sa kapulisan nga mohapit dinhi ang mga tawong nagpayuhot og gidiling druga gikan sa maong mga lugar.

Si Senior Supt. Ronald dela Rosa, provincial police commander, nimando sa kapulisan nga angayang panid-an ang lihok sa mga tawong kadudahan ang panagway.

Gipakalma hinuon sa DDSPPO ang katawhan sanglit alang nila hugot ang pagbantay sa lalawigan ilabi pa nga gawas sa gidiling druga, gibantayan sab nila ang hulga sa terorismo.

Nakig-alayon na sab ang DDSPPO ngadto sa Provincial Anti-illegal Drug Special Operation Task Force (PAIDSOTF) aron susihon ang mga dapit nga hayan mo-istar ang mga illegal drug traders.

Apan gipaniguro ni Dela Rosa nga di makalihok ang mga tawong magpayuhot og gidiling druga sa lalawigan. Bisan mga tunghaan gibantayan sa kapulisan aron di mabiktima ang mga magtutungha.

Gipaniguro sab sa kapulisan nga way mga dagkong shabu dealer sa palibot ug hugot sab nilang gibantayan ang marijuana.

Usa sa mga lugar nga giingong gikuhaan og marijuana mao ang bukirang bahin sa Barangay Kimlawis, lungsod sa Kiblawan, Davao del Sur. Apan kanunay nang ginasaka sa kapulisan ang bukid aron pang-ibton ang mga tinanom nga marijuana nga matud pa gipaluyohan sa mga bandido. (Orlando B. Dinoy)