USA ka barangay tanod ang gitigbas patay mga alas 6 sa gabii didto sa Barangay Goma, siyudad sa Digos.
Ang biktima nga nakaangkon og daghang mga samad tinigbasan sa iyang lawas gikan sa mahait nga sundang giilang mao si Rosalito Custodio, minyo ug lumolupyo sa maong dapit.
Ang suspek nga mao si Cristino Jorillo, 66, ulitawo, laborer, ug silingan ra sab sa biktima.
Si Jorillo nasikop sa mga barangay opisyal sa lugar ug gilayong gitunol ni Barangay Kagawad Modesto Belayo didto sa Digos City Police Office (DCPO).
Nilutaw sa imbestigasyon sa kapulisan nga nagbikil ang suspek ug biktima nga nisangko sa mainitong panaglalis.
Wa makapugong ang suspek niadtong higayona ug giingong nikuha og sundang ug gitigbas dayon ang biktima.
Wa na matabang ang biktima sanglit nabugtoan na kini og gininhawa atol sa hitabo.
Ang biktima gikuha sab dayon sa Angel Funeral Homes ug gi-otopsiya ang patay'ng lawas.
Si Police Officer 3 Felomino Vertudazo nihan-ay sa mga ebidensiya alang sa isang-at nga kaso batok suspek. (Dondon Dinoy)