MILUPAD ang ispiritu sa upat ka mga tawo dihang mibusikad sa ilang nahimutangan ang usa ka granada nga gilabay sa wa mailhing mga tawo sa alas 8:40 sa gabii niadtong Martes.
Base sa spot report sa Talomo Police Station, ang insidente nahitabo atubangan sa Mercy Store, Purok 51, Green Valley, Diversion Road, Barangay Maa, siyudad sa Davao.
Dihang mibusikad ang granada gibati og di tiaw nga kalisang sila Marlon Piad, 36, drayber sa RJH Construction ug nagpuyo sa Malagamot, Panacan; Fortunato Babol, 36, purchaser ug nagpuyo sa Dumanlas, Buhangin; Jim Lee, 54; ug John Borbe, nagpuyo sa Diversion Road.
Sila Piad, Babol, Lee ug Borbe nagsulti sa kapulisan nga nag-inom lamang sila sa maong lugar apan kalit lang miabot ang duha ka tawo ug giitsa ang granada.
Ang upat nagbutyag sa kapulisan nga nagpasalamat sila sanglit wa sila naigo sa maong pagbusikad sa granada nga gilabay sa duha ka mga tawo.
Human sa maong hitabo, daling miresponde sila Police Chief Inspector Joselito Loriza, hepe sa Talomo Police Station, MSgt. Edgardo Olata sa Task Force Davao ug mga sakop sa Technical Support Platoon sa Davao City Police Office (DCPO) nga gipangulohan ni SPO2 Jimmy Libranza.
Gisusi karon sa mga otoridad ang motibo sa duha ka mga tawo kinsa nagtinguha sa kinabuhi nila Piad, Babol, Lee ug Borbe. (AD)