SA katuyuan nga kahatagan og panaghiusa ang mga local government units, gisugyot ni Bise Presidenti Jojo Binay ang hingpit nga pag-abolish sa barangay ug Sanguniang Kabataan Elections unya ihatag nalang sa mga Mayor ang ang pagtudlo og mga Kapitan del Baryo kinsa mao nalang usab ang mopili og si kinsa’y iyang palingkuron sa konseho.

 

Pagkabati ning maong sugyot. Ang atong gobernadora sa Probinsya Gwendolyn Garcia ang naglumpayat dayon sa pagsuporta kay niya pa, kini ang solusyon sa mga panagsumpaki sa pulitika nga moresulta sa pagkakompromiso sa serbisyo ug mga proyekto sa mga  lugar kansang mayor ug mga Kapitan ang wala nagkapareha sa Partidong gipasilungan. Kung ang Mayor na ang adunay diskresyon sa pagtudlo sa barangay Captain, mas sayon ug mas dali nalang unya ang paghimo og plano sa kalambuan og ang pagpatuman og pagkumpleto sa mga proyekto sa mga local government units nga moresulta sa mas maayong serbisyo alang sa publiko.

Gawas pa, kining maong pamaagi ang magsalbar sa gastos sa atong pangobyerno nga mokabat og P3.5 bilyunes nga mamahimo na unyang idapat sa mas mahinungdanong panginahanglan, hilabi na kay karon nagkabikos-bikos ang panudlanan sa miasumir nga administrasyong Aquino.

Apan ang panagsumpaki sa baruganan mao may espiritu sa demokratikanhong pangobyerno.

Tinuod nga mas sayon kining maong sistema nga ilang gibahug sa lamesa ug gustong ipakaon sa katawhan apan ang pangutana kay kini naghikaw man usab sa katungod sa katawhan sa pagpili sa ilang mga opisyal sa barangay nga tahasan sa pagdala sa renda sa pangagamhanan nga maoy nag-unang pundasyon sa republican democratic system of government.

Apil usab sa grasya sa atong pagka-demokrasya ang power of accountability nga anaa sa kamot sa atong katawhan. Kon magtinarong man ugaling ang mga opisyal sa Barangay sa ilang pagpangalagad sa ilang mga konstituwente, kana tungod kay sila man ang magdeterminar panahon sa eleksyon kon makapadayon pa ba siya o dili sa iyang paghupot sa maong katungdanan.

Kon adto na kini ihatag sa mayor, mamahimong ang loyalty sa kapitan ang dili na maadto sa katawhan kun dili adto sa appointing authority nga mao ang Mayor.

Unya panahon sa eleksyon, ang maneguro gyung modaug ang iyang giilang agalon aron magpabilin sila sa gihuptang poder. Kining maong istratehiya sayon ug epektibo alang sa mga Mayor ug sa gobernador hangtod na sa mga nangambisyon nga mag-presidenti sa nasud kay ang Barangay man ang atong basic political unit.

Ang pagpatay sa demokrasya ug pagbanhaw sa diktadorya sa bisan unsang hinungdan ug katurangan ang angayang atong supakon og pagababagan. Sa Political Science giila ang demokrasya nga “trial and error government” mao nga sa sigeng suway-suway lagmit tang mangadusmo.