MORAG hilas man kaayo tan-awon si Mayor Mike Rama sa telebisyon nga nagsul-ob og firefighting gear sa dihang mi-ulbo ang sunog sa T. Padilla niadtong Lunes sa udto.

Nagpabombero-bombero naman pod ni siya. Ambot og mihawid pod ba kaha siya sa hose og mi-apil sa pagpakumbati aron mapawong ang kayo? Dili kini unang higayon nga gihimo ni Mike bisan niadtong bise mayor pa siya.

Unsa may iyang tumong nga mag-apil-apil siya sa operasyon sa mga bombero kon adunay sunog? Papogi point? Pamulitika bisan bag-o pa ang eleksiyon? O gara-gara lang gyod aron ingnon nga kuyaw ning mayor sa Sugbo kay motabang og motrabaho gyod. Dili baya na mao. Ako dili ko modayeg nang maong trabaho sa mayor.

Hinoon, misaway ko kay dili na iyang trabaho. Maayo pa nagbombero nalang si Mike og wala mag-abogado ug mayor.

GROUND COMMANDER

Sa mga operasyon sama anang sunog, naa gyod nay ground commander nga maoy magmando sa tanang mga mirespondeng bombero kon unsa ang ilang positioning or unahon sa pagpawong.

Kasagaran niana usa ka senior officer. Posible ang fire marshall gyod. Nan karon, kon naa si Mike diha mag-apil-apil og mando, maguba ang kamada kay maglibog naman ang mga bombero kon si kinsa ang tumanon? Ang fire marshall o ang mayor?

Labi pa gyod og mohawid nag-hose si Mike, mangilog gikan sa bombero. Kanang mga bombero, nag-agi kana sila og insaktong training. Ila nang expertise. Unya diay mayor ug abogado nga wala mag-agi og training, magpagara-gara na hinoon og pawong sa kayo?

MADISGRASYA

Diha sa sunog daghang posibling mahitabo. Simbako languyon og pito ka lawod ug magdisgrasya si Mike. Matumpagan ba kaha og madat-ugan. O masunog ba kaha. Unsa na lang ang mahitabo?

Mao nang gisaway ta ka, Mr. Mayor, ning imong gihimo kay concerned ug nagpakabana lang ko nimo. Ingon ana tika ka pinangga mao nang dili ko gusto nga madisgrasya ka.

Mag-unsa na lang ang mga Sugbo-anon kon wala ka na kay gilamoy kana sa kayo o nadat-ugan ka og semento? Ma-ilo ang mga Sugbo-anon og dili ka makatiwas sa imong termino.

Mamayor og ahat si Joy Young ani. Unya magsige na lang og bakho si Inday Joy Pesquera kon simbako adunay mahitabo kanimo kay nagpa-alig-alig ka nga bombero ka. Sunod, Mr. Mayor, tan-aw ka na lang kon adunay mahitabong sunog. Ayaw na pag-apil-apil.

Pero kon moadto man pod ka sa fire scene, ayaw lang pod intawon pag-amerkana ha?

(bobby@sunstar.com.ph)