DUNAY mga punto kining proposal ni vice-president Jojo Binay nga wagtangon ang barangay election ug ang mayor na lang maoy motudlo kon kinsay iyang himuong kapitan sa barangay.

Niini, alang kaniya, di na unya langan ang pagpadagan sa mga proyekto ug programa nga ihapak ngadto sa mga barangay kay igo na man lang mosuporta ang mga kapitan.

Kon wa na say barangay election, di na sab makagasto ang gobiyerno ug makadaginot pa kini og P3.4 billion nga unta maoy gastuhon sa 42,000 ka mga barangay sa tibuok nasod alang sa piniliay.

Pero angay sab gyud unta lantawon sa bise presidente kon unsay disbintaha niini. Sa maong proposal, mora na man hinuon og tawo-tawo na lang ang kapitan sa mayor nga mahimo na lang but-an kon unsay angay buhaton sa barangay.

Mora og empleyado siya sa opisina sa mayor nga di makalihok sa iyang kaugalingong kabubut-on kay lagi tinudlo ra man siya.

Kaluoy usab sa mga taga barangay kon maka-kapitan sila og tawo nga dili kaugalingon nilang gusto.

Sa laktod nga pagkasulti, gikuhaan ni Binay ug katungod ang magbuboto sa barangay nga mopili sa ilang kaugaling lider. Usa ka matang sa diktardoryang panggobiyerno.

Dili baya tanang kapitan nga magsalig lang sa iyang mayor. Dunay pipila ka mga barangay leader nga makapalambo sa ilang dapit pinaagi sa iyang kaugalingong paninguha.

Pananglitan sa Barangay Lahug. Bisan pa man og higpit nga kontra ni kanhi Cebu City Mayor Tomas Osmeña ang ilang kapitan nga si Mary Ann delos Santos, apan malambuon kaayo ang maong barangay nga wa magsalig sa mayor.

Unya og madayon kining proposal ni Binay, mosugot kaha ang taga Lahug nga mailisan ang ilang kapitan?

Kini ehemplo lang.