Rodel D. Nuñeza

Maslog, Tabogon, Cebu

MANAOG na unta si Berto sa ilang balay dihang nadunggan niya ang pagtunog sa selpon sa iyang maguwang nga si Margie. Gitungtong kini diha sa ibabaw sa ilang telebisyon.

Kay wala man ang iyang maguwang kay nagbantay man kini sa ilang tindahan nga nahimutang sa kilid sa ilang bilyaran, iyang gipunit ang selpon. Iyang gitan-aw ang ‘inbox’ sa selpon aron pagsusi kon unsay mensahe nga gipadangat ngadto sa iyang maguwang ug kinsa usab ang nagteks. Samtang siya nagbasa sa mensahe nagsige sab siyag pasigpat sa ilang tindahan. Nahadlok siya nga maabtang nanghilabot sa selpon ni Margie.

Hilabihang ham-uta ni Berto pagkasayod nga si Junie diay ang mi-teks. Si Junie ilang silingan. Ug ang nahimut-an niya pag-ayo mao ang unod sa mensahe, nga mao ang pagsuna niini kon may paglaom ba siya si Junie sa gugma ni Margie. Nanguyab diay si Junie sa iyang maguwang.

Hinuon, dugay nang nakasabot si Berto nga may gusto si Junie sa iyang maguwang, kay kanunay man kining mag-estambayan sa ilang tindahan, ilabi na kon si Margie maoy nagbantay niini. Kalagmitan god si Margie man maoy mobantay sa ilang tindahan panahon sa kagabhion ug sa mga adlaw nga dili tingklase.

Dili man piyalan si Berto sa ilang inahan nga maoy mobantay sa tindahan. Kadaghan na man god siya masakpi nga nangubit og mga sinsilyo gikan sa halin sa tindahan.

Mangluklok sab siyag kinahang sigarilyo para iyang tabak-on.

Wala dayon iuli ni Berto ang selpon gikan sa iyang gikuhaan niini. May nahunahunaan siya. Gusto niyang makabawos sa iyang maguwang, kay si Margie ang tigsumbong ngadto sa ilang inahan bahin sa iyang pagpangubit og sinsilyo gikan sa halin.

Nakahukom si Berto sa pagtubag sa gi-teks ni Junie ngadto sa iyang maguwang. Nagpaka Margie kunohay siya niadtong tungora. Ginamit ang selpon sa iyang maguwang, gi-teksan ni Berto si Junie. Nagbayloay og mga matam-is nga pulong sa gugma sila si Junie ug Berto nga nagpaka Margie. Unya taudtaod pa gibalik ni Berto ang selpon sa iyang maguwang sa ibabaw sa telebisyon.

USA ka buntag niana nakamata pag-ahat si Bert okay nagkalangas man diha sulod sa ilang panimalay. Puwerte mang nakaminatayg hilak ang iyang inahan nga si Inse Juaning.

Gisigihan kinig alam-alam sa iyang amahan nga si Noy Pabling.

Ug nahibaw-an ni Berto nga milakaw diay og hilom si Margie. Mikuyog kini sa usa ka lalake nga ilang silingan.

Daw dili si Berto makatuo nga ang iya diay nga gibinuangan pinaagi sa teks maoy mitaban sa iyang maguwang. Si Junie.

Wala gyud siya magdahom nga mosangpot og ingon niadto ang iyang binuang. Usa siya sa mabasol sa gidangatan sa iyang igsuon.

Nasabot karon ni Berto nga dako sad diay og gusto si Margie kang Junie. Naghulat na lang diay ang iyang maguwang nga mopadayag si Junie sa tinuod niining gibati ngadto kaniya.

Sa laing bahin, angay nga magpasalamat si Margie ug si Junie kaniya, kay siya man si Kupido nga nagpana sa ilang mga kasingkasing. (KATAPUSAN)