GIPATUWAD sa pagpakanaog sa hagdanan ang usa ka says anyos nga batang lalake sa iyang amahan unya gibundak dihang niabot na siya sa ubos.

Niini, si Rito (tinuod ngan gipugngan), 31, lumolupyo sa Sitio Ginabsan, Barangay Basak San Nicolas, dakbayan sa Sugbo, nag-atubang sa kasong kalapasan sa Republic Act (RA) 7610 kon Child Abuse tungod sa insidente niadtong Agusto 5 sa buntag.

Updates on President Benigno Aquino III's presidency

Niadto sa kapulisan ang biktima nga si Renato (tinuod nga ngalan gipugngan) aron moreklamo sa gibuhat sa iyang amahan kaniya.

Nisaysay si Renato nga nagkaon siya dihang masuk-anon siyang gitawag sa iyang amahan.

Matod niya nga gitawag ang iyang ngalan apan wa siya mokanaog sa balay nga iyang gikan-an kay pwerti niyang hadloka sa iyang amahan.

Apan, gisaka siya ni Rito, kinsa nisulti kaniya nga “di ka manaog?” dayon gibunlot siya unya gikuptan ang iyang ulo ug kamot.

Siya nialegar nga ang sunod nga nahitabo “gikugos ko ni Papa nga patuwad padung naog sa hagdanan. Pag-abot sa ubos iyaha ko gibundak ug gibira akong kamot paingon sa balay.” Wa pa gyod kini matagbaw, pag-abot sa ilang balay giparok ang iyang ulo sa pultahan, gibunalan og kahoy ang iyang lawas ug gisagpa ang iyang nawong.

Wa siyay nahimo apan igo na lang sa paghilak kay pwerte niyang hadloka ug iyang nasinati ang kasakit sa iyang nawong ug lawas.

Nakasaksi ang uyoan sa bata sa gibuhat ni Rito apan giingnan sila nga “wa moy labot kay ako ning anak.”

Niini, niadto sila sa barangay hall sa Basak San Nicolas unya nikuyog nila ang mga barangay tanod dayon ilang gisikop si Rito.

Hinuon, mamahimong kasamtangang gawasnon ang suspek ning giatubang niyang kaso human nirekomendar ang Cebu City Prosecutor’s Office nga makapiyansa og P80,000.