GIHIKTAN ang duha ka mga kamot sa 17 anyos nga dalaga ug giingong gilugos siya sa 21 anyos nga lalake sa kasagbutan.

Human sa insidente gibiyaan siya sa suspek apan maayo na lang kay nakit-an siya sa iyang higala busa nakalingkawas siya.

Updates on President Benigno Aquino III's presidency

Niini, nipasaka ang biktima nga si Lorna (tinuod nga ngalan gipugngan) og kasong pagpanglugos batok kang Wellie (tinuod nga ngalan gipugngan), 21, may live-in partner, molupyo sa Sitio Laray, San Roque, dakbayan sa Talisay tungod sa insidente niadtong milabayng buwan.

Ang suspek nanghimakak sa pasangil.

Si Lorna nisaysay nga niadtong Hulyo 21, 2010 nanguha silag tangkong uban sa iyang mga higala aron ilang sud-anon.

Dihang mamauli na sila, ang uyab sa usa sa iyang mga higala niawhag kanila nga di una sila mamauli ug gidala sila sa “kiosk” unya niabot usab didto si Wellie.

Apan, kalit nga gigunitan sa suspek ang iyang kamot ug gidala siya sa kasagbutan uban sa pag-awhag nga makig-estorya siya apan kalit siyang giduot dayon gihiktan ang iyang mga kamot ginamit ang pisi.

Gihuboan siya ni Wellie bisan pa man nga nisuway siya sa pagsukol apan wa siyay nahimo kay gihiktan man og pisi ang iyang mga kamot busa nilampos gyod kini sa palugos kaniya.

Human siya gilugos, giingong gibiyaan siya sa suspek busa nisiyagit siya aron mangayog tabang.

Maayo na lang kay nakit-an siya sa lain niyang higala unya gibadbad ang gihikot nga pisi sa iyang mga kamot.

Subay niini, niuli gilayon siya sa ilang balay ug gisumbong niya kini sa iyang igsuon ug amahan busa nisang-at silag reklamo sa ilang barangay nga niresulta sa pagsikop kang Wellie. (JECT)