NAUSAB ang plano sa kagamhanan sa dakbayan sa Lapu-Lapu sa pagbalhin sa mga manindahay gikan sa ilang merkado publiko ngadto na sa Muelle Osmeña. Ang karaang merkado gihulagway nga gabok ug kuyaw mahugno.

Una niini, ang plano ni Mayor Paz Radaza nga ibalhin sa Muelle Osmena Wharf ang mga manindahay.

Updates on President Benigno Aquino III's presidency

Apan gumikan sa kagamay ra sa lugar, kakuwang sa drainage ug pansayan nahukman nga ibalhin na lang sila sa ubos nga bahin habig na sa karsada.

Si City Administrator Rodulfo Ybañez niingon nga ilang dalion ang plano tungod kay ayuhon man ang maong merkado ilabi na sa isdaan tungod sa kagabok na niini.

Matod ni Ybanez nga di angay mahadlok ang mga manindahay nga di na makabalik sa ilang puwesto tungod kay posibling mausab lang ang ilang lugar apan silang tanan makabalik ra gyod sa pagpaninda.

Gisalikway niya ang kahadlok ug pagtuo sa ubang mga manindahay nga ang City Hall adunay laing plano sa merkado hinungdan nga sila gidali-dali sa pagpabalhin.

Si Assistant City Engr. Alan Pedrigal niingon nga gikinahanglang ayuhon na sa labing dali nga panahon ang merkado tungod sa gabok na ug kakaraan na iini.

Samtang si Elena Caballes, market administrator, niingon nga ang pag-usab sa plano sa siyudad daling gihangop sa mga manindahay ug andam na ang tanan manindahay nga mobiya sa ila karong giukopahan.

Si Frank Brazil, pangulo sa city traffic management system, niingon nga wa na silay nakitang suliran sa dagan sa trapiko kon mahinayon na ang plano. (DRT)