Maestra nga gisikop nakapiyansa

WALA na nakatilaw sa prisuhan ang usa ka maestra human nakapiyansa dihang gisikop sa mga sakop sa City Intelligence and Detection Unit (Cidu) niadtong Lunes sa Barangay Bugo ning siyudad sa Cagayan de Oro.

Si Police Officer 1 Janice Alcontin sa Cidu nga nahinabi sa Sun.Star Superbalita niingon nga mga alas 8:25 sa buntag niadtong adlawng Lunes gisikop ang maestra nga mao si Christina Marylyn Dalingay, 57, minyo, sa susamang dapit.

Gibutyag ni Alcontin nga kini ubos sa warrant of arrest nga gi-isyu ug pirmado ni Judge Evelyn Neri sa kasong child abuse ubos sa balaod nga RA 7610 kon Special Protection of Children Against Abuse, Exploitation and Discrimination Act.

Gikasuhan ang maestra sa mga ginikanan sa 11 anyos nga tinun-an sa Grade 5. Giingon wala gipasulod sa maong magtutudlo ang bata sa klase tungod kay wala makabayad sa giingong tuition fee.

Tungod sa maong hitabo giingong gibati og kaulaw ang bata ug giingong nakasinati og psychological distress.

Human miguwa ang warrant of arrest niini gihimo dayon ang operasyon pagsikop sa maestra.

Sa hiniusang puwersa sa Cidu malampuson nga nasikop si Dalingay sulod mismo sa tunghaan nga gitrabahoan niini sa Villa Trinitas, Barangay Bugo.

Nakapiyansa og P80 mil ang suspetsado alang sa iyang temporaryo nga kagawasan. (Stephanie V. Berganio)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph