NAUSO na sab ang cattle rustling didto sa lungsod sa Magsaysay, Davao del Sur nga mao ang nag-unang suliran sa Kiblawan, Davao del Sur.
Ang drayber nga si Librado Baguion Jr., hingkod ang pangedaron ug taga Barangay Barayong, Magsaysay, gilayong nangayo og tabang sa buhatan sa kapulisan human iyang nadiskubrihan nga wa na sa iyang gitugwayan ang babayeng kabaw nga nagpangedaron na og kapin kun kulang duha ka tuig.
Matod niya nga mga alas 4:30 sa hapon niadtong miaging adlaw, uwahing gibiyaan niya ang kabaw didto sa tugwayanan apan sa iyang pagbalik aron hipuson wa na didto ang hayop.
Hinuon, wa na napakyas ang biktima sa pagdangop sa otoridad human nadakpan ang suspek nga nailhang mao si Rene Ofima, 43, minyo nga molupyo gihapon sa maong lugar.
Giadtoan sab sa kapulisan ang kabaw nga gidala sa suspek didto sa Purok Pakikisama, Barangay Rizal, sa silingang lungsod sa Bansalan, Davao del Sur.
Gikasohan na sa Magsaysay Police ang suspek kinsa gipriso sa selda. Si Police Officer 2 Roy Ildefonso, padayong nihimo og imbestigasyon sa suspek aron sutaon kung aduna bay kalambigitan siya sa ubang kasong pagpangawat og kahayupan sa ilang lugar. (Dondon Dinoy)