USA ka barangay kapitan didto sa Sto. Niño, Kiblawan, Davao del Sur gipusil patay sa mga de-motorsiklong mamumuno.

Sumala sa nahagpat nga taho nga gisundan sa mga suspek ang biktima gikan sa dakbayan sa Digos.

Mga alas 12:50 sa udto niadtong Miyerkules nahitabo ang krimen. Ang biktima nga naligo sa kaugalingong dugo nailhang mao si Ananias Pelletero, 45, minyo ug taga Kiblawan.

Si Kapitan Pelletero nagmaneho sa iyang kolor itom nga Honda XRM motorsiklo samtang pauli na unta sa Kiblawan. Apan pag-abot niya didto sa Barangay Tanwalang, lungsod sa Sulop, Davao del Sur, duha ka mga wa mailhing suspetsado nga nagsakay sa laing motorsiklo ang nagpusil sa kapitan.

Si Pelletero nahiagom og tulo ka mga samad pinusilan sa ulo ug walang bahin sa hawak ug nalimbuwad sa gimanehong motor. Gisuwayan pagdala ang biktima sa duol nga Gregorio Matas Hospital apan matod sa mga doktor "dead on arrival" na siya.

Ang kapulisan nga niabot sa nahitaboan sa krimen, igo na lang namunit sa duha ka mga basiyong bala ug usa ka tingga sa gituohang kalibre .45 pistola. Apan wa na nila maabti ang mga kriminal nga gilayong nisibat padung sa wa matinong direksyon.

Kagahapon sa buntag, si Senior Police Officer 1 Robert Ubas nihimo na og dugang imbestigasyon aron sutaon kung ang hitabo aduna bay kalabutan sa politika ilabi na nga nagsingabot ang synchronized SK ug Barangay elections sa Oktubre.

Ang patay'ng lawas sa biktima gidala na didto sa St. Peter Funeral Home sa siyudad sa Digos alang sa otopsiya. (Orlando Dinoy)