UBOS sa balaod, ang mga syudad nga mahimong highly urbanized mahimo nang gawasnon gikan sa probinsya, ingon sa naputol na ang pusod gikan sa tagoangkan, di na mananghid kon unsay buhaton ug sila nay magbuot sa pagpanday sa ilang mga balaod.

Di na sab sila makaapil sa pagpili sa mga opis-yales sa probinsya sama sa nanghitabo sa dakbayan sa Sugbo ug sa Lapu-Lapu.

Updates on President Benigno Aquino III's presidency

Ang nasukwahi ra mao ang dakbayan sa Mandaue kay bisan nahimo na kining highly-urbanized makabotar pa gihapon ang mga lomulupyo sa maong dakbayan sa mga opisyales sa probinsya sa Sugbo.

***

Dunay sugyot si Cebu Gov. Gwen Garcia nga ibalik sa probinsya ang mga highly urbanized cities ug morag nakauyon niini ang pipila ka mga opisyales sa syudad sa Sugbo.

Wa mobalibad sama sa bao nga nagpakiluoy nga di intawon iitsa sa tubig kay nahadlok nga malumos.

Tiaw mo kon madayon, ang syudad sa Sugbo adunay kapin sa tunga sa milyon ka mga botante nga mahimong base o kaha balwarte sa usa ka politiko nga gustong maoy mokontrolar sa lalawigan sa Sugbo.

***

Di na nato makit-an si Presidente Noynoy “PNoy” Aquino. Wa siya magtago ug di sab siya tanggulilong.

Ang akong gipasabot mao ang iyang mando nga di niya buot nga makita ang iyang ngan ug initial sa bisan unsang programa o proyekto sa kagamhanan. Kon naanad kamo sa nagbansiwag nga ngan ni kanhi presidente Gloria Macapagal-Arroyo sa mga karatola sa bisan unsang mga proyekto, pangandam kay  di na mo kakita ni Pnoy.

***

Duna man guy balaodnon niini si Senador Chiz Escudero nga kon mapasar, maghimong usa ka krimen ang pagbutang sa ngan sa mga opisyales sa kagamhanan sa mga proyektong gigastohan sa buhis sa katawhan.

Ang Senate Bill 2187 ni Senador Escudero naglakip sa mga waiting shed, ambulasya ug bisan na sa mga trash can basta gibayran sa buhis sa publiko. Porbida, di na ni magamit sa mga pulitiko sa ilang pangampanya para sa reelection nga gitawag og “Oplan Paalaala.”

***

Kon mopasar ang maong balaudnon, ang makalapas niini pahamtangan sa silot nga pagkabilanggo sulod sa usa ka tuig ug multa gikan sa P100,000 ngadto sa usa ka milyon ka pesos.

Di kaha maayo nga ang maong balaudnon apilan og budget sa pagpadako sa atong mga prisohan kay tingalig maghuot unya sila?

Asa na lang unya ang mga love projects sa atong mga kongresista?