BIYERNES trese karong adlawa. Matod pa sa mga matuho-tuhoon nga delikado karong adlawa kay doul ta sa disgrasya. Motuo ka man o dili, ayaw lang gyod og kumpiyansa ug kanunay mosangpit sa Labaw’ng Makagagahum aron malikay sa disgrasya.

****

Bisan kon kongresista na siya, si Tomas Osmeña nanghilabot gihapon sa pulitikanhong kalihukan sa lalawigan sa Sugbo.

Siguro gusto lang niyang sungogon si Gov. Gwen Garcia o ba kaha gusto lang gyod niya nga kanunay’ng mo-init pagbalik ang ilang panagsungi.

Updates on President Benigno Aquino III's presidency

Kay medyo mikalma man karong panahona.

Gibutyag ni Kong. Osmeña nga andam niyang hatagan og mga multicab ang mga lungsod sa lalawigan nga gi-imbarguhan ni Gwen. Kining maong mga lungsod mao ang Pinamungajan ug Tuburan kansang mga mayor dili kaalyado sa gobernador sa One Cebu Party. Mga sakop kini sa third district kansang representante mao si Kong. Pablo John Garcia.

UNAHON

Nganong manghilabot man gayod si Tomas nga aduna man siyay kaugalingong distrito?

Nganong magpakabana man gyod siya sa lalawigan nga daghan man sa iyang mga barangay diha sa south district ang mas nagkinahanglan og sakyanan? Iyang pasagdan si Pablo John nga mosulbad anang maong problema. Aduna silay tagsa-tagsa ka Priority Development Assistance Fund (PDAF) o kining pork barrel nga angay lang usab gamiton diha sa ilang tagsa-tagsa ka mga distrito.

Unsa man makahatag siya og multicab sa iyang mga barangay kansang mga kapitan dili niya kaalyado sa Bando Osmeña Pundok Kauswagan (BOPK) sama nila ni Jun Gabuya sa Cogon, Pardo ug ni Romeo Ocarol sa Pasil nga didto misuporta sa iyang kaatbang nga ni Atan Guardo niadtong miaging eleksiyon? Unahon nato ang atong tugkaran sa dili pa kita manghilabot sa laing tugkaran.

LAAYAN

Kana si Tomas Osmeña dili na magdugay isip kongresista. Laayan na didto sa Kongreso kay dili na siya makabuga o maka-arte og maayo didto sama sa iyang pagkahari diri sa dakbayan. Diri siya ang gi-ila nga Ginoo apan didto morag ra siya og tinun-an sa elementarya unya section 10 pa gyod. Diri siya man ang manginsulto. Apan didto puwede siyang insultuhon sa iyang mga kaubanan. Puwede sukit-sukiton og maayo.

Tan-aw nako kini si Tomas inig abot sa 2013 election, mo-ingon na ni Mike Rama nga “bansili ta Mike. Balik ko pagkamayor, ikaw didto sa Kongreso.” Aw, mao pod na siguro ang ganahan ni Mike kay taas man na kaayo siya modiskorso. Total nakatilaw naman siya pagkamayor nga dugay na niyang gihandom nga mosunod sa tikang og mga lakang sa iyang lolo Vicente Rama Sr. Kana kon maayo pa ang lawas ni Tomas ana.