NAIGO sa kilat ang usa ka mekaniko sa iyang pagsusi sa tubig sa uwan sa ilang baril gawas sa ilang balay sa miaging gabii.

Niadtong higayuna nigamit og cell phone nga dunay flashlight ang biktima sa iyang pag-iwag samtang siya nagbarog sa pultahan sa ilang balay sa Sitio Lantawan Brgy. Damolo lungsud sa Sogod.

Updates on President Benigno Aquino III's presidency

Ang biktimang si Joseph Coliflores Presbitero, 31, minyo, dunay duha ka anak, auto mechanic, dead-on-arrival sa Juan Dosado Memorial Hospital sa nahisgutang lungsod human maigo ang iyang dughan sa kilat.

Si PO3 Elymar Mendoza, imbestigador sa Sogod Police nga nahinabi sa Sun. Star Superbalita, niingon nga nag-brown-out niadtong hiyuna samtang nagbunok ang uwan.

Nagsige usab og pangilat.

Ang biktima nisusi sa gawas sa ilang balay aron susihon ang baril nga gisawran sa tubig sa uwan.

Matod pa ni Mendoza, nga ang biktima uban sa iyang asawa ug duha ka mga anak diha sa ilang balay nikuha sa cell phone nga dunay flashlight ug nangabli sa atubangang purtahan aron paglantaw sa baril nga gisawod sa tubig sa uwan kon puno na ba kini.

Apan sa iyang pag-abli sa pultahan ug pag-iwag sa flashlight, kalit lang naigo sa kilat ang biktima hinungdan nga natumba.

Gidali siya sa pagtabang sa iyang asawa apan nakasulti pa kini nga di siya hikapon ug pasagdan lang una siya.

Iya pang gisugo ang iyang asawa nga kuhaon ang cell phone nga nalagpot.

“ Pagkatumba niya nakasulti pa siya. Okay pa man daw. Unya dili lang siya magpahikap sa iyahang asawa seguro kay nagpamati to siya sa iyahang lawas nga murag duna pay kuryente,” sumala pa ni Mendoza.

Pipila ka gutlo ang nakalabay, ang biktima gitabangan sa pag-alsa ug gidala sa iyang asawa ug mga paryente ngadto sa tambalanan apan namatay gyud.

Si Mendoza nidugang nga open space usab ang gipuy-an sa biktima diin ang balay niini didto sa bungtod nga nagpatong hinungdan nga dihang ni kilat diretso kining naigo.

Wa maigo ang cell phone kon dili naguba lang kini human malagpot tungod kay ang naigo sa kilat mao ang dughan sa biktima. Gani way mga timailhan nga dunay mga paso ang kamot niini.