PEKE nga mga identification card ug birth certificate ang gigamit sa pipila ka mga nagparehistro sa buhatan sa Commission on Elections (Comelec) alang sa barangay election ug Sangguniang Kabataan (SK) election karong bulan sa Oktubre 2010.
Sa napulo ka adlaw nga pagpangrehistro nasayran nga pipila sa mga botante ning siyudad ang nigamit og mga peke nga dokumento labina ngadto sa mga botante nga nagikan sa layong barangay.
Kini gikumpirmar ni City Elections Supervisor Joanne Vallejos.
"When we interviewed one of the registrants, we learned that the ID cards were only made from a printing press near the Comelec office," ni Vallejos.
"Our suspicions grew upon knowing that all of them were claiming to be workers of mining companies in the upland barangays."
Nasayran nga mahimong i-reject ang mga aplikante kung walay dugang nga ikapakita sama sa:
* notarized affidavit nga magpamatuod nga sila residente sa maong barangay
* residency certification gikan sa barangay
* notarized statement sa saksi nga magsuporta sa ilang claim nga sila residente sa maong barangay
Hinuon gipahimangnoan na usab ang maong establismento nga naghimo og peke nga mga ID card ug nataho na usab sa kapolisan.
Apil sa namatikdan ang mga gustong magpapili sa eleksiyon ang niunay pagparehistro sa ilang mga sakop sa barangay aron makadugang og boto sa umaabot nga eleksiyon.
Mahuman na
Samtang natapos na kagahapong adlawa ang rehistro sa mga botante sa barangay samtang ugmang adlawa matapos ang rehistro sa SK.
Ning siyudad sa Cagayan de Oro namatikdan nga matag-adlaw kanunay ang pagdaghan sa mga botante nga gustong magparehistro ug daghan ang naghangyo nga unta ma-extended pa ang rehistro.
Kahinumduman nga ang registration period alang sa barangay nagsugod niadtong Agusto 4 ug matapos sa Agusto 13, samtang gisugdan sa petsa 6 sa Agusto ang sa SK registration ug matapos sa Petsa 15.
Apan usa ka personahe sa city Comelec ning siyudad sa Cagayan de Oro nibutyag sa Sun.Star Superbalita nga wala silay nadawat nga mando gikan sa kaulohan nga lugwayan ang registration ug igo lang sila maghulat sa desisyon. (Stephanie V. Berganio/uban sa taho ni ALR)